«Altynkól» jáne «Dostyq» stansalarynyń basshylary men oblystyq memlekettik kirister departamentiniń tóraǵasy qyzmetinen bosatyldy
Qazaqstan-Qytaı shekarasyndaǵy «Altynkól» jáne «Dostyq» stansalarynyń basshylarymen qatar, oblystyq memlekettik kirister departamentiniń tóraǵasy da qyzmetinen bosatyldy. Bul týraly eldiń qarjy mınıstri Erulan Jamaýbaev shekaradaǵy keden beketterin tekserý barysynda habarlady, dep habarlaıdy Almaty-akshamy.kz Almaty.tv-ge silteme jasap.
Qurǵaq port pen «Nurly jol», «Altynkól» ótkizý beketterin baqylaǵan shendiler ondaǵy júk tasymaldaýshylarmen de jeke kezdesti.
«Árıne, problemalar bar. Birinshiden, bul elektrondyq kezekke baılanysty. Avtokólikpen júk tasıtyndardyń kúndelikti aıtyp júrgen máselesi. Odan keıin, olardyń quny. Alypsatarlar alyp kelip jatqan taýarlardyń baǵasyn kóterip jibergen. Sonymen qatar osy jerdiń máselesin sheshý kerek», - dedi QR Qarjy mınıstri Erulan Jamaýbaev.
11 qańtarda el prezıdenti kedendegi bylyqtardy joıýdy tapsyrǵan edi. Ásirese kólikter tekserilmeıtin, salyq pen baj tólenbeıtin Qazaqstan-Qytaı shekarasyna basa nazar aýdarýǵa shaqyrǵan. Endi Memlekettik kirister komıteti tekseris úshin arnaıy top qurylǵanyn, onyń quramyna prokýratýra men Qarjy mınıstrligi mamandarynyń kiretinin jetkizdi.
«Biz sol jumystardy úılestire bilsek, jaqyn arada taýar aınalymyn joǵarylatyp, odan túsetin kedendik baj salyǵyn búdjetke kóbeıte alamyz. Osyndaı úlken josparlar quryp otyrmyz», - dedi Erulan Jamaýbaev.