Bul másele Úkimettiń erekshe baqylaýynda.
Qańtar oqıǵasy kezinde qaza bolǵan kúshtik qurylym qyzmetkerleriniń otbasyna páter beriledi. Bul týraly Májilistiń jalpy otyrysynda Úkimet basshysynyń orynbasary Eraly Toǵjanov aıtty, dep habarlaıdy Almaty-akshamy.kz QazAqparatqa silteme jasap.
Osy oraıda ol baspanamen qamtamasyz etý máselesi Úkimettiń erekshe baqylaýynda ekenin atap ótti.
«Barshasyna belgili, qańtardaǵy qaıǵyly oqıǵalar kezinde kúshtik qurylym qyzmetkerlerinen 19 adam qaza boldy. Olardyń arasynda shekara akademıasynyń úsh kýrsanty da bar. Qazirgi kezde naqty sheshim bar, ıaǵnı 13-ine qatysty sheshim qabyldanyp, baspana berildi. Óńir ákimderimen qalǵan alty adamǵa qatysty máseleni talqyladym. Osy oraıda kýrsanttarǵa baılanysty kóterilgen másele de nazardan tys qalmady. Sondyqtan bul másele 25 sáýirge deıin sheshiletin bolady», - dedi Eraly Toǵjanov depýtattardyń suraqtaryna jaýap bere otyryp.
Eske sala keteıik, bıyl naýryz aıynda Almaty oblysynda qasiretti qańtar oqıǵasy kezinde aýyr jaraqat alyp, baqılyq bolǵan 4 polısıa jáne áskerı qyzmetkerlerdiń otbasylaryna baspana kiltteri tabystaldy.