Batyrlyq – qanymyzǵa sińgen qasıet
Memleket basshysy Otan qorǵaýshy kúnine arnalǵan saltanatty jıynda sóz sóılep, sardarlar men sarbazdardy, ardagerlerdi merekemen quttyqtady, dep habarlaıdy Almaty-akshamy.kz.
«Osydan otyz jyl buryn Tuńǵysh Prezıdent Nursultan Ábishuly Nazarbaevtyń Jarlyǵymen Qazaqstannyń Qarýly Kúshteri quryldy. Bul memlekettigimizdi nyǵaıtý jolyndaǵy mańyzdy qadam boldy», – dedi Qasym-Jomart Toqaev.
Prezıdent egemendik alǵan kezde áskerı áleýeti myqty armıa jasaqtaýǵa basa mán bergenimizdi, otanshyl ári kásibı mamandardyń arqasynda bul mindet oıdaǵydaı atqarylǵanyn atap ótti.
«Qorǵanys salasyndaǵy negizgi máseleler der kezinde sheshimin tapty. Osy mańyzdy jumysqa elimizdiń tuńǵysh Qorǵanys mınıstri, Halyq qaharmany Saǵadat Nurmaǵambetov ólsheýsiz úles qosty. Onyń mol tájirıbesi Qarýly Kúshterimizdiń negizin qalaýǵa zor septigin tıgizdi. Búginde «Jas ulan» áskerı mektebine jáne Qurlyq áskerleriniń áskerı ınstıtýtyna Saǵadat Nurmaǵambetovtiń esimi berilgen», – dedi Prezıdent.
Memleket basshysy aıbyndy armıamyz Táýelsizdigimizdiń qorǵany, Jańa Qazaqstannyń tiregi ekenin aıtyp, otanshyl ári qaısar sarbazdarymyz el qaýipsizdigin senimdi qorǵap turǵanyna toqtaldy.
«Olar batyr babalardyń dańqty jolyn laıyqty jalǵastyryp keledi. Qazaq úshin eldik pen erlik – egiz uǵymdar. Batyrlyq – qanymyzǵa sińgen qasıet. Qazybek bı aıtqandaı, «Biz – jerimizge jaý tımesin dep, naızaǵa úki taqqan elmiz». Uly dala ulandary qashanda aq bilektiń kúshimen, aq naızanyń ushymen atamekenin qorǵaı bilgen. Altaıdan Atyraýǵa deıingi keń baıtaq jerin urpaqqa mıras etken. Biz amanatqa adal bolyp, elimizdiń tutastyǵy men tynyshtyǵyn saqtaý úshin bárin jasaımyz. Bul – Qazaqstannyń árbir azamatynyń qasıetti boryshy», – dedi Qasym-Jomart Toqaev.
Prezıdent elimizdiń áskerı doktrınasy tek qorǵanysqa baǵyttalǵanyn, ulttyq múddelerdi qorǵaý máselesinde dıplomatıaǵa súıenetinimizge erekshe mán berdi. Qasym-Jomart Toqaevtyń aıtýynsha, bizdiń syrtqy saıasatymyz syndarly, salmaqty, eldiń ulttyq múddesin qorǵaýǵa baǵyttalǵandyqtan, memleketterdiń bárimen dostyq qarym-qatynas ornatyp kelemiz.
«Biraq buryn-sońdy bolmaǵan álemdik geostrategıalyq shıelenis jaǵdaıynda elimizdiń qorǵanys qabiletin arttyrýdyń máni zor. Áskerı-tehnıkalyq saladaǵy halyqaralyq yntymaqtastyqty damytý – Qazaqstan úshin mańyzdy. Bitimgerlik qyzmetiniń arqasynda Qazaqstan armıasy álemdik deńgeıde tanyldy. 1990 jyldary biz Tájikstanǵa alǵash ret bitimgerlik kúsh jiberdik. Qazaqstandyq áskerıler BUU men EQYU mısıalary aıasynda tabysty qyzmet atqardy. Búginde bizdiń bitimgerlik kontıngent Lıvan men Batys Saharada júr», – dedi Memleket basshysy.
Prezıdenttiń pikirinshe, munyń bári Qazaqstannyń beıbitshilik pen turaqtylyqty saqtaýǵa eleýli úles qosa alatyn senimdi seriktes retindegi bedelin nyǵaıtady. Sonymen qatar Qarýly Kúshterdi joǵary tehnologıalyq qarý-jaraqpen jáne tehnıkamen qamtamasyz etýge úlken mán beremiz. Naqty urys qımyldarynda tıimdiligin dáleldegen qarý úlgilerin satyp alamyz jáne otandyq kásiporyndarda shyǵaramyz.
«Búginde armıamyz álemdik standartqa saı jabdyqtalǵan. Sonymen qatar jańa jahandyq syn-qaterler Qarýly Kúshterimizdiń jaýyngerlik qabiletin arttyrý úshin ońtaıly sheshimder izdeýdi talap etedi. Sondyqtan, meniń tapsyrmam boıynsha joǵary mobıldi jáne gıbrıdti soǵystar júrgizýge qabiletti arnaıy operasıalyq jasaqtar quryldy. Álemdegi sońǵy oqıǵalardyń tájirıbesin eskere otyryp, biz áskerı is-qımyldardyń strategıasy men taktıkasyn únemi jetildirip otyramyz. Jeke quram júıeli túrde jaýyngerlik daıyndyqty pysyqtaıdy, aýqymdy oqý-jattyǵýlar ótkiziledi. Bolashaq ofıserlerdi daıarlaýdyń zamanaýı júıesi quryldy», – dedi Qasym-Jomart Toqaev.
Memleket basshysy áskerı bilim berý salasyna arnaıy toqtaldy. Onyń aıtýynsha, ul-qyzdarymyz respýblıkalyq áskerı mektepterde Otan qorǵaý isin meńgere bastaıdy jáne elimizde úzdik áskerı oqý oryndary bar.
«Onyń kósh basynda turǵan Ulttyq qorǵanys ýnıversıteti qaýipsizdik salasyndaǵy iri ǵylymı ortalyqqa aınaldy. Memleket áskerı qyzmetshilerdiń áleýmettik jaǵdaıyn jaqsartýǵa basa nazar aýdaryp keledi. Olarǵa baspana beriledi, basqa da jeńildikter usynylady, laıyqty jalaqy tólenedi. Jastar úshin áskerı boryshyn óteý jáne Qarýly Kúshter qatarynda kelisimshartpen qyzmet etý – abyroıly mindet. Shyn máninde, armıa – ómir mektebi ǵana emes. Sonymen birge maqsaty aıqyn jáne otanshyl jastardyń bolashaǵyna jol ashady. Osy oraıda, ásirese, basshylyq quramǵa zor jaýapkershilik júkteledi. Sizderdiń Otan aldyndaǵy adal qyzmetterińiz jastarǵa úlgi-ónege bolyp, aıryqsha erik-jiger beredi», – dedi Prezıdent.
Qasym-Jomart Toqaev Uly Jeńis qarsańynda Otan qorǵaýshy kúnin toılaýdyń sımvoldyq máni zor ekenin, Ekinshi dúnıejúzilik soǵys adamzat tarıhynda óshpes iz qaldyrǵanyn atap ótti. Prezıdenttiń aıtýynsha, soǵys kezinde halqymyz kózsiz erlik pen qaısarlyq kórsetti.
«Respýblıkamyzda soǵysqa deıingi jyldary qurylǵan zaýyttar men soǵys kezinde kóshirilgen kásiporyndar armıany qamtamasyz etýde, Jeńisti jaqyndatýda zor ról atqardy. Fashısik basqynshylarmen shaıqasta janqıarlyq erlik kórsetkeni úshin Qazaqstannan shaqyrylǵan 500-den astam jaýynger Keńes Odaǵynyń Batyry ataǵyn aldy. Qan maıdanda qazaqtyń arýlary da erlikpen shaıqasty. Qaharman qyzdarymyz Álıa Moldaǵulova men Mánshúk Mámetovanyń aty ańyzǵa aınaldy. Bıyl Hıýaz Dospanovanyń týǵanyna 100 jyl tolady. Ol – 300-den astam áýe joryǵyn jasaǵan. Elimiz táýelsizdik alǵannan keıin áıgili ushqyshqa «Halyq qaharmany» ataǵy berildi. Biraq áli de kóptegen otandasymyzdyń batyrlyǵy laıyqty baǵalanbaı keledi. Sondyqtan tarıhı ádildik ornatý – Otan aldyndaǵy qasterli mindetimiz», – dedi Qazaqstan Prezıdenti.
Memleket basshysy sol sebepti, búgin surapyl soǵystaǵy erligi elenbeı qalǵan batyrlarymyzǵa «Halyq qaharmany» ataǵyn berý týraly Jarlyqqa qol qoıǵanyn aıtyp, ataqty mergender Tóleýǵalı Ábdibekov pen Ybyraıym Súleımenov jáne atqyshtar batalónynyń komandıri Aleksandr Nesmıanovtyń esimderin atap ótti.
«Osy qaharmandarymyzǵa tıisti ataqtaryn berý – tarıhı ádildikti ornatý degen sóz. Biz dańqty erlerimizdiń rýhyna taǵzym etemiz. Maıdangerler men tyl eńbekkerleriniń erligin jadymyzda jańǵyrtý – perzenttik paryzymyz. Olardyń ómir joly urpaqqa úlgi-ónege bola beredi», – dedi Qasym-Jomart Toqaev.
Prezıdent sóziniń sońynda jıynǵa qatysýshylardy Otan qorǵaýshy kúnimen jáne Jeńis meıramymen quttyqtap, merekelik konsertti tamashalady.