Serdar Berdimuhamedov Qasym-Jomart Toqaevqa shaqyrýyn qabyl alǵany úshin rızashylyǵyn bildirdi.
Memleket basshysy Qasym-Jomart Toqaev Túrikmenstan Prezıdenti Serdar Berdimuhamedovpen kezdesti, dep habarlaıdy Almaty-akshamy.kz Aqordaǵa silteme jasap.
Ashhabadta uıymdastyrylyp jatqan Altynshy Kaspıı samıtine qatysýǵa kelgen Memleket basshysy Qasym-Jomart Toqaev Túrikmenstan Prezıdenti Serdar Berdimuhamedovpen kezdesý ótkizdi.
Qazaqstan Prezıdenti, eń aldymen, túrikmen jerindegi dástúrli qonaqjaılyǵy úshin rızashylyǵyn bildirdi. Bul – Serdar Berdimuhamedov Prezıdent bolyp saılanǵannan keıingi eki el basshylarynyń alǵashqy betpe-bet kezdesýi. Osyǵan oraı Memleket basshysy Túrikmenstannyń jańa Prezıdentin saılaýdaǵy jeńisimen quttyqtady.
Sonymen qatar Qasym-Jomart Toqaev búgin Ashhabadta ótetin Altynshy Kaspıı samıtine erekshe mán beretinin jetkizdi. Qazaqstan Prezıdenti samıttiń nátıjesi Kaspıı mańy memleketteriniń dostyq pen tatý kórshilik baılanystaryn odan ári nyǵaıtýǵa eleýli úles qosyp, ózara tıimdi yntymaqtastyqtyń kókjıegin keńeıtetinine senim bildirdi.
Serdar Berdimuhamedov Qasym-Jomart Toqaevqa shaqyrýyn qabyl alǵany úshin rızashylyǵyn bildirip, osy samıtke qatysty oıyn aıtty. Túrikmenstan Prezıdenti bárimizge ortaq Kaspııdiń ıgiligi úshin búgin keleli basqosý bolatynyn jetkizdi.