Eren eńbekteri joǵary baǵaǵa laıyq.
19 qazan kúni Qazaqstanda qutqarýshylar kúni atalyp ótedi. Qazaqstan Prezıdenti Qasym-Jomart Toqaev otandyq qutqarýshylardy kásibı meıramymen quttyqtady, dep habarlaıdy Almaty-akshamy.kz Aqordanyń baspasóz qyzmetine silteme jasap.
«Qurmetti dostar!
Barshańyzdy Qazaqstan Respýblıkasynyń «Qutqarýshy kúni» kásibı merekesimen quttyqtaımyn!
Sizder óz ómirlerińizdi qaterge tigip, únemi tótenshe jaǵdaıda jumys istep júrsizder. Bul mártebeli mindetti abyroımen atqaryp kelesizder.
Mamandyqqa adaldyq tanytý, erlikke jáne kez-kelgen synaqqa daıyn bolý – tótenshe jaǵdaı qyzmeti mamandaryna qoıylatyn basty talap. Tabıǵı jáne tehnogendi apattar kezinde, kúndelikti syn sátte sizderge úlken jaýapkershilik júkteledi.
Halqymyzdyń ıgiligi men tabıǵatymyzdyń qundylyqtaryn túrli qaýip-qaterden qorǵap, búginge deıin myńdaǵan adamnyń ǵumyryn saqtap qaldyńyzdar. Sondyqtan eren eńbekterińiz eń joǵary baǵaǵa laıyq.
Sizder aldaǵy ýaqytta da qyzmettik boryshtaryńyzdy minsiz atqaryp, el aldyndaǵy mańyzdy mısıany jalǵastyra beresizder dep senemin.
Jaýapty jumystaryńyzǵa tabys, otbasylaryńyzǵa amandyq tileımin!», - delingen quttyqtaýda.