Prezıdent Qasym-Jomart Toqaev "Ortalyq Azıya – Japonıya" dıalogynyń bírínshí sammıtínde sóz sóıledí, - dep habarlaıdy aqshamnews.kz tílshísí.
Memleket basshysy búgíngí tarıhı kezdesudí ūıymdastyruǵa bastamashy bolǵany jáne qonaqjaılyq tanytqany úshín Japonıya Premer-mınıstrí Sanae Takaıchıge alǵys aıtty.
"Damu deńgeıí tūrǵysynan bíregeı megapolıs sanalatyn Tokıoda ūıymdastyrylǵan mańyzdy forumǵa qatysu Qazaqstan, típtí tūtas Ortalyq Azıya úshín aıtuly uaqıǵa dep oılaımyn. "Ortalyq Azıya – Japonıya" dıalogyn qūru turaly bastamany japon tarapy, sonyń íshínde būrynǵy Syrtqy íster mınıstrí Yorıko Kavaguchı kótergen edí. Mūnyń sımvoldyq mání zor. Syrtqy íster mınıstrlerí deńgeıíndegí alǵashqy jıyn 2004 jyly Astanada óttí. Būl Ortalyq Azıya elderí men ózge de írí memleketter arasynda osy tektes platformalardy qūruǵa úlgí boldy", – dedí Qazaqstan Prezıdentí.
Qasym-Jomart Toqaevtyń píkírínshe, mūndaı sammıtter Ortalyq Azıyanyń halyqaralyq deńgeıdegí orny kúsheıíp, jahandyq úderísterde mańyzdy ról atqara bastaǵanyn kórsetedí.
"Qazaq jūrty japon halqynyń tarıhyna, salt-dástúrí men mádenıetíne árdaıym qūrmetpen qaraıdy. Kúnshyǵys elíníń kelísím, ūstamdylyq, danalyq sekíldí qūndylyqtarǵa qūrylǵan fılosofıyasy qazaq halqynyń dúnıetanymyna saı keledí. VII ǵasyrdyń ózínde Syotoku hanzada úılesímdí eń bıík qūndylyq retínde atap, bírlík pen yntymaqqa úndedí. Sol tūsta Japonıya "Reıva" – "Keremet úılesím" dáuíríne qadam basty. Japonıyanyń Ortalyq Azıya elderímen baılanysy ejelgí Ūly Jíbek jolynan bastau alady", – dedí Qasym-Jomart Toqaev.
