Kezdesý barysynda Qazaqstan men Qytaı arasyndaǵy jan-jaqty strategıalyq seriktestikti nyǵaıtýdyń perspektıvalary talqylandy
Memleket basshysy Qasym-Jomart Toqaev Lı Hýeıge iltıpat bildirip, eki el arasyndaǵy qarym-qatynastardy damytýǵa QHR-diń Qazaqstandaǵy elshisi bolǵan kezde qosqan úlesin atap ótti, dep habarlaıdy Almaty-akshamy.kz Akorda.kz-ke silteme jasap
Prezıdent ózara yqpaldastyqtyń, sonyń ishinde 2019 jyly qyrkúıekte óziniń Pekınge memlekettik sapary barysynda máńgi yntymaqtastyq jáne strategıalyq seriktestikti nyǵaıtý týraly qol qoıylǵan birlesken Deklarasıanyń aıasynda qarqyndy damyp kele jatqanyn aıtty.
– Memleketterimiz arasyndaǵy dostyq qatynastar árqashan damı beredi. Pandemıaǵa baılanysty týyndaǵan qıyndyqtarǵa qaramastan, bıylǵy 10 aıdyń ishinde eki el arasynda saýda kóleminiń óskeni baıqalady. Kelesi jyly jáne aldaǵy jyldarda elderimiz arasyndaǵy saýda-sattyq tabysty damı beredi dep oılaımyn, – dedi Qasym-Jomart Toqaev.
Memleket basshysy bıylǵy qarasha aıynda ótken IV Qytaı halyqaralyq ımporttyq taýarlar kórmesin joǵary baǵalap, onda óziniń beıneúndeý jasaǵanyn atap ótti. Sondaı-aq ekijaqty saýda kólemin ulǵaıtý jáne onyń qurylymyn jaqsartý jumystaryn odan ári júrgizýdiń mańyzdy ekenin aıtty.
Prezıdent Qasym-Jomart Toqaev QHR Tóraǵasy Sı Szınpınge júrekjardy sálemin joldaı otyryp, aldaǵy jyly ony Qazaqstanǵa memlekettik saparmen keledi dep kútetinin jetkizdi. Osy mańyzdy is-sharanyń naqty merzimi dıplomatıalyq joldar arqyly kelisiletin bolady.
Lı Hýeı Prezıdentke Jańa jyl qarsańynda kezdesýge múmkindik bergeni úshin rızashylyǵyn bildirip, Qazaqstan men QHR arasyndaǵy dıplomatıalyq qatynastardyń ornaǵanyna 30 jyl tolýymen quttyqtady. Arnaýly ókildiń aıtýynsha, osy kezeńde Qazaqstan Nursultan Nazarbaevtyń dana basshylyǵymen zor jetistikterge qol jetkizdi jáne qazirgi ýaqytta Qasym-Jomart Toqaevtyń basqarýymen ekonomıkamen qatar basqa da salalar boıynsha qarqyndy damyp keledi.
– Qazaqstan Táýelsizdiktiń 30 jyly ishindegi damý jolynda zor jetistikterge qol jetkizdi. Qazir Sizdiń elińiz búkil álem qurmetpen qaraıtyn bedeldi memleketke aınaldy. Qytaı-qazaq qatynastaryna keletin bolsaq, osy jyldar ishinde biz dostyq jáne strategıalyq qarym-qatynastarymyzdy damytý barysynda orasan zor jetistikterge qol jetkizdik. Biz osy yntymaqtastyǵymyz barysynda qol jetkizilgen nátıjelerdi maqtan tutamyz. Bul – alǵashqy 30 jyl ǵana. Al bolashaqta biz dástúrli dostyǵymyz ben strategıalyq seriktestigimizdi ıyq tirestire otyryp, odan ári birlese jalǵastyra beremiz, – dedi QHR Úkimetiniń arnaýly ókili.
Qytaılyq dıplomat Qazaqstan Prezıdentine kelesi jyly Beıjińde ótetin XXIV qysqy Olımpıada oıyndarynyń ashylý saltanatyna qatysýǵa shaqyrýyn tabystady.
Kezdesý sońynda Qasym-Jomart Toqaev Lı Hýeıdi ózara tıimdi qazaq-qytaı yntymaqtastyǵyn nyǵaıtýǵa qosqan úlesi úshin, sondaı-aq Qazaqstan men Qytaı arasyndaǵy dıplomatıalyq qatynastardyń ornaǵanyna 30 jyl tolýyna oraı II dárejeli «Dostyq» ordenimen marapattady.
