Almatylyqtar Jańa jyldy toılaýǵa qyzý daıyndalyp, otshashýlar, basqa da jarylǵysh zattar satyp alýda.
Qutqarýshylar men dárigerler tipti sertıfıkattalǵan pırotehnıka nusqaýlyqty saqtamaǵan jaǵdaıda densaýlyqqa zıan keltirýi múmkin ekenin atap ótti, dep habarlaıdy Almaty-akshamy.kz
Almaty qalasy TJD Memlekettik órt baqylaý basqarmasynyń basshysy Aleksandr Raý Óńirlik komýnıkasıalar qyzmetiniń alańynda feıerverkterdi qalaı durys jaǵý jáne pırotehnıkany tańdaý týraly aıtyp berdi.
A. Raýdyń málimetteri boıynsha, Almatyda jyl saıyn ortasha eseppen 16 órt tirkeledi, bul rette órttiń 13%-ǵa jýyǵy pırotehnıkalyq buıymdardy paıdalanýdan bolady. Sońǵy 6 jylda 80 órt boldy, onyń 10-y dál osy sebeppen.
Aleksandr Raý otshashýlar tek oıyn-saýyq qana emes, sonymen birge úlken qaýip ekenin atap ótti. Sondyqtan pırotehnıkalyq ónimderdi paıdalanǵan kezde óte muqıat bolý kerek. Óıtkeni, ónimniń kúmándi sapasy jáne ony durys paıdalanbaý qaıǵyly jaǵdaıǵa ákelýi múmkin. Eger otshashý áli de satyp alynsa, órt sóndirýshilerdiń keńesterin este ustaǵan jón.
«Pırotehnıkalyq buıymdardyń jumys isteý prınsıpi olardyń áleýetti qaýiptiligin kórsetedi. Sondyqtan olar órt qaýipti jáne jarylǵysh bolyp bólinedi. Maqsaty boıynsha pırotehnıkalyq buıymdar turmystyq nemese tehnıkalyq maqsatta bolady. Qaýiptilik dárejesi boıynsha olar bes synypqa bólinedi. Turmystyq qoldaný úshin tek I, II nemese III qaýiptilik synybynyń buıymdaryna ruqsat etiledi. Bul aqparat mindetti túrde qaptamada kórsetilýi tıis», - dep habarlady Almaty TJD ókili.
Budan basqa, qaptamada: qaýip týraly eskertý, daıyndaýshynyń ataýy men ornalasqan jeri, standart nemese oǵan sáıkes buıym daıyndalǵan ózge qujat, jaramdylyq merzimi, qaýipti faktorlar men qaýipti aımaqtyń mólsheri, qaýipsiz saqtaý jáne kádege jaratý jónindegi talaptar, qoldaný jónindegi Nusqaýlyq kórsetilýi tıis.
Barlyq jazýlar memlekettik jáne orys tilderinde bolýy tıis. Pırotehnıkalyq buıymdardyń sertıfıkaty nemese sáıkestik deklarasıasy bolýǵa mindetti. Bul rette atalǵan qujattardyń qoldanylý merzimi úsh jyldy quraıdy.
«Árqashan sáıkestik sertıfıkatyn talap etińiz, árbir pırotehnıkalyq buıym qoldaný jónindegi nusqaýlyqpen jabdyqtalǵan, ony zerdeleńiz. Bul sizdi qate áreketterden qorǵaıdy», - dedi A. Raý.
Qutqarýshy pırotehnıkany jabyq úı-jaılarda paıdalanýǵa, balalardy tastap ketýge jáne olardy óz betimen paıdalanýǵa ruqsat etýge úzildi-kesildi jol berilmeıtinin naqtylady. Sondaı-aq, onyń aıtýynsha, pırotehnıkalyq buıymdardy kólik quraldary men turǵyn úılerdiń janynda paıdalaný órtke sebep bolýy múmkin. Pırotehnıkany shatyrlarda, ǵımarattardyń qasbetteriniń shyǵyńqy bólikterinde, tarıh jáne mádenıet eskertkishterinde jáne bazarlarda paıdalanýǵa tyıym salynady. Belgili sebepterge baılanysty jarylǵysh zattardyń janynda temeki shegýge bolmaıdy.
Saqtyq sharalary men pırotehnıkany paıdalaný jáne ótkizý erejelerin saqtaý densaýlyq pen múlikti saqtaýǵa kómektesedi jáne merekeden tek jaqsy áser qaldyrady. Aıta keterligi, qutqarýshylar men polıseıler bıyl 1,5 tonna sertıfıkattalmaǵan pırotehnıkany anyqtady, 12 adam jaýapkershilikke tartyldy.