Transshekaralyq Jaıyq ózeni qazir qıyn jaǵdaıda
Memleket basshysy Qasym-Jomart Toqaev EAEO elderiniń ekologıalyq máselelerin birlesip sheshýdi usyndy, dep habarlaıdy Almaty-akshamy.kz QazAqparatqa silteme jasap.
«Biz «jasyl» ınvestısıalardy arttyrý men tıisti jobalardy iske asyrý múmkindikterin júıeli túrde keńeıtýdi josparlap otyrmyz. Ekologıalyq problemalar jahandyq sıpatta bolady jáne álemniń barlyq derlik eline, sonyń ishinde Qazaqstanǵa da áser etti. Máselen ótken jyly jaýyn-shashyn men ózenderdegi sýdyń az bolýynan kóptegen fermerler qurǵaqshylyqtan zardap shekti. Transshekaralyq Jaıyq ózeni qazir qıyn jaǵdaıda», - dedi Qazaqstan Prezıdenti Peterbýrgtegi XXV halyqaralyq ekonomıkalyq forýmda.
Q. Toqaev memleketterdiń ornyqty damýyna tóngen osyndaı uzaqmerzimdi syn-qaterlerdi birlesip sheshý keregin aıtty.
«Tuıyq sıkl ekonomıkasy» - sırkýlárlyq ekonomıka qaǵıdattaryn engizý keleshegin qaraýymyz kerek dep oılaımyn. Biz JİÓ-niń energıa syıymdylyǵyn azaıtý, jańartylatyn energetıka sektoryn keńeıtý jáne osy saladaǵy tranzıttik shyǵyndardy azaıtý boıynsha jumys istep jatyrmyz», - dedi Qasym-Jomart Toqaev.
Aıta keteıik, Qasym-Jomart Toqaev Peterbýrgtegi halyqaralyq ekonomıkalyq forýmǵa qatysyp jatyr. Sesıada Qazaqstan Prezıdenti Qasym-Jomart Toqaev, sondaı-aq beınekonferensıa baılanysy arqyly Egıpet Prezıdenti Abdýl-Fattah As-Sısı sóz sóıleıdi. Forým qatysýshylaryna Qytaı Halyq Respýblıkasynyń Tóraǵasy Sı Szınpın beıneúndeý joldaıdy. Spıkerler sóz sóılep bolǵan soń suraq-jaýap formatynda ashyq pikirtalas ótedi.