QR Mádenıet jáne sport mınıstri Qasym-Jomart Toqaevqa mádenıet, sport, týrızm jáne arhıv salalarynda atqarylyp jatqan jumystar boıynsha málimet berdi.
Sonymen qatar el Táýelsizdiginiń 30 jyldyǵyna, óner jáne mádenıet qaıratkerleriniń mereıtoılaryna arnalǵan is-sharalar týraly baıandaldy, dep habarlaıdy Almaty-akshamy.kz Aqordanyń resmı saıtyna silteme jasap.
Aqtoty Raıymqulova Memleket basshysyna Sháken Aımanov atyndaǵy «Qazaqfılm» kınostýdıasynyń jumysy, Ulttyq kınony qoldaýdyń memlekettik ortalyǵy, sondaı-aq «Kınematografıa týraly» zańǵa engiziletin tolyqtyrýlar týraly málimet berdi. Onyń aıtýynsha, bıyl sarapshylar keńesi men vedomstvoaralyq komısıa maquldaǵan 42 kınojobany qarjylaı qoldaý josparlanǵan.
Qasym-Jomart Toqaevqa shyǵarmashylyq úıirmeler men sport seksıalaryn jan basyna qaraı qarjylandyrý jumystary týraly aqparat berildi. Elimizde balalar men jasóspirimderdiń 50 paıyzyn qamtyǵan 22 myńǵa jýyq shyǵarmashylyq úıirme men 126 myń sport seksıasy jumys isteıdi.
Mınıstr mádenıet jáne sport salalaryndaǵy zańnamaǵa ózgerister men tolyqtyrýlar engizý jumysy týraly baıandady.
Sonymen qatar, kezdesý barysynda ishki týrızmdi damytýdyń perspektıvalary, osy salany sıfrlandyrý máseleleri talqylandy. Qazirgi ýaqytta birqatar sıfrlyq sheshimder iske qosyldy. Kazakhstan.travel ulttyq týrısik portaly, Týrızm onlaın, View Project, eQonaq júıesi, gıdterdiń biryńǵaı tizimi, sondaı-aq kórsetilgen qyzmet sapasyna qatysty pikir nemese shaǵym qaldyrýǵa múmkindik beretin E-Shagym modýli sıaqty jańa resýrstar ázirlenip jatyr.
Prezıdentke IýNESKO-men yntymaqtastyqtyń jaǵdaıy týraly baıandaldy. Búginde Qazaqstan atynan Búkilálemdik muralar tizimine tarıhı jáne mádenı on eskertkish engizilgen. Aqtoty Raıymqulovanyń aıtýynsha, mınıstrlik IýNESKO tizimine materıaldyq jáne materıaldyq emes mádenı muranyń jańa nysandaryn engizý boıynsha belsendi jumys júrgizip jatyr.
Kezdesý sońynda Qasym-Jomart Toqaev mınıstrge osy baǵyttaǵy jumystardy jalǵastyrýdy tapsyrdy.