3 kúdikti qamaýǵa alyndy
Túrkistan oblysy PD Krımınaldyq polısıa qyzmetkerleri arnaıy operasıa júrgizý nátıjesinde oblystyń 3 aýdanynyń aýmaǵynda balyq resýrstaryn zańsyz óndirýmen aınalysqan kúdiktilerdiń jolyn kesti, dep habarlaıdy Almaty-akshamy.kz.
Túrkistan oblysy PD bastyǵynyń orynbasary polısıa polkovnıgi Qurmanbek Sahovtyń aıtýynsha, kúdiktiler balyq aýlaýǵa qajetti barlyq qural-jabdyqtarmen jabdyqtalǵan.
«Túrkistan oblysy PD Krımınaldyq polısıa basqarmasy men Jyldam qımyldaıtyn arnaıy jasaq qyzmetkerleri birlesip, Túrkistan oblysynyń 7 turǵynynan turatyn aldyn ala sóz baılasý arqyly qylmys jasaǵan adamdar tobyn ustadyq, olardyń biri buryn sottalǵan. Kúdiktiler balyq aýlaýǵa qajetti barlyq qural-jabdyqtarmen jabdyqtalǵan, ıaǵnı qaıyqtar, kostúmder, elektr qondyrǵylaryn qoldana otyryp, tabıǵı resýrstardy óndirýdi tabys kózine aınaldyrǵan», - delingen aqparatta.
Belgili bolǵandaı, brakonerler túngi ýaqytta Shardara jáne Kóksaraı sý qoımalarynda, tabıǵat qorǵaý ınspektorlarynyń joq sátin bilip, zańsyz balyq aýlaǵan. Sodan keıin olar eki avtokólikpen zańsyz aýlanǵan balyqtardy Shymkent qalasynyń bazarlaryna aparyp satqan. Aqshasyn ózara bólisip otyrǵan.
«Qazirgi ýaqytta aldyn ala sóz baılasyp qylmys jasaǵandardyń zańsyz balyq aýlaýdyń 3 jaıtyna qatystylyǵy dáleldendi. Al keltirilgen shyǵyn kólemi 11,5 mıllıon teńgeden asady. Kúdiktilerdiń turǵylyqty jerin tintý kezinde, 2 avtokólik, 3 qaıyq, 4 qaıyq qozǵaltqyshy, 10 qarmaq, 6 balyq aýlaý kostúmi, 2 radıostansıa jáne basqa da balyq aýlaý quraldary, sondaı-aq 120-dan astam balyq aýlaý torlary men 1,5 tonnadan astam zańsyz aýlanǵan balyq tárkiledik. Búginde 3 kúdiktini qamaýǵa aldyq, toptyń qalǵan múshelerine qatysty "eshqaıda ketpeý týraly qolhat" túrinde bultartpaý sharasy tańdaldy. Tergeýdi QR QK 335-baby "Balyq resýrstaryn, basqa sý janýarlaryn nemese ósimdikterin zańsyz óndirý" boıynsha júrgizýdemiz. Oqıǵanyń barlyq mán-jaıy anyqtalýda», - dep túıindedi polısıa polkovnıgi Q.Sahov.