Memleket basshysynyń tapsyrmasyna sáıkes muǵalimder men oqýshylardyń qarjylyq saýattylyǵyn arttyrýǵa baǵyttalǵan aýqymdy joba jalǵasýda.
Oqý baǵdarlamasy qarjy jáne bilim berý salasyndaǵy halyqaralyq sarapshylardyń usynymdary negizinde ázirlengen, - dep habarlaıdy Aqshamnews.kz.
Bes kúndik kýrs barysynda QR Oqý-aǵartý mınıstrliginiń «Órleý» biliktilikti arttyrý ulttyq ortalyǵynyń trenerlerleri pedagogterge qarjyny basqarýdyń negizgi qaǵıdattaryn úıretedi. Muǵalimder qarjylyq minez-qulyq psıhologıasy, otbasyndaǵy búdjet pen shyǵyndardy josparlaý ádisterin meńgeredi. Al QR Ulttyq Banki mamandary ınflásıanyń jeke qarjyǵa yqpaly, ınvestısıa, sıfrlyq aktıvter, nesıe men zeınetaqy júıesi, alaıaqtyqtyń túrlerin ajyratý jáne jeke derekterdi qorǵaý taqyryptarynda dáris oqıdy.
Osylaısha, bir apta ishinde elimizdiń barlyq óńirinen «Jahandyq quzyrettilik» pánin oqytatyn 500-ge jýyq pedagog arnaıy kýrstan ótip, mektep oqýshylaryna dáris oqýdy bastaıdy. Jyl sońyna deıin olardyń sany 6 myńǵa jetip, 2026 jyly taǵy shamamen 4 myń muǵalim qamtylady.
Qarjylyq saýattylyqty bilim berý júıesine engizý - ekonomıkalyq turaqtylyqty nyǵaıýtýǵa baǵyttalǵan mańyzdy qadam. Bul bastama qoǵamnyń qarjylyq mádenıetin artyryp, qarjy pıramıdalary men ınternet alaıaqtyqtan qorǵanýdy kúsheıtedi.