2 qazanda Abaı atyndaǵy Qazaq ulttyq pedagogıkalyq ýnıversıtetiniń Basqarma tóraǵasy-rektor Bolat Tilep Almaty qalasy Bilim basqarmasynyń jalpy bilim beretin mektepteriniń dırektorlarymen kezdesti.
Kezdesýge ýnıversıtettiń akademıalyq máseleler jónindegi departamenti men pedagogıka kafedrasynyń meńgerýshisi Sh. Kolýmbaeva, Almaty qalasy Bilim basqarmasynyń mektepteriniń basshylary men pedagogıka synyptarynda sabaq beretin profesor-oqytýshylar quramy qatysty, dep habarlaıdy Almaty-akshamy.kz.
«Kezdesýde ýnıversıtetimizdiń Basqarma-tóraǵasy mektep dırektorlaryn kásibı mereke – Muǵalimder kúnimen quttyqtap, búginde elimizdiń joǵary bilikti pedagogtarǵa degen suranysynyń joǵary ekenin atap ótti. Mine, osy turǵydan kelgende orta mektep pen Abaı ýnıversıtetiniń birlese júrgizip otyrǵan bul jobasy óte ózekti dep sanaımyn. Osy jobanyń júzege asýyna muryndyq bolyp, ýnıversıtetimizben áriptestik ornatqandaryńyz úshin Sizderge alǵys bildiremin», – dedi rektor Bolat Tilep.
Bul bastamany biz byltyrǵy oqý jylynda úlken pılottyq joba retinde qolǵa alǵan edik. Ondaǵy maqsat Almaty qalasynyń Bilim basqarmasymen birlese otyryp qalanyń eki mektebinen pedagogıkalyq mamandyqtarǵa ıkemi bar joǵary synyp oqýshylaryn ustazdyqqa beıimdeý bolatyn. Nátıjesinde Abaı ýnıversıteti atalǵan mektepterde ortalyqtar ashyp, bilikti profesor-oqytýshylarymyzdyń kómegimen mektep oqýshylaryna jyl boıy bilim berip, jekelegen pánderden tapsyrmalar daıyndap, únemi baqylap otyrdy. Bul da erteńgi urpaq qamy úshin Abaı ýnıversıtetiniń qolǵa alyp otyrǵan ıgi bastamasy edi. Atalǵan bastama Memleket basshysynyń Qazaqstan Respýblıkasynda bilimdi damytýdyń 2022-2026 jyldarǵa arnalǵan tujyrymdamasy negizinde iske asyrylǵan bolatyn.
Sondaı-aq basqosýda pedagogıka kafedrasynyń meńgerýshisi Sholpan Kolýmbaeva pedagogıkalyq synyp oqytýshylaryn tanystyryp, qolǵa alynǵan jumystar boıynsha qoıylǵan suraqtarǵa jaýap berdi.
Kezdesýde mektep dırektorlary ýnıversıtet tarapynan qolǵa alynǵan jobaǵa qatysýǵa úlken qyzyǵýshylyq tanytty. Óskeleń urpaqty «Ustaz» bolýǵa beıimdeıtin bul jobanyń mektep oqýshylary úshin bereri mol. Bul salada sizderdiń bilikti mamandaryńyzben tájirıbe almasý bizge úlken múmkindikter beredi, – dep kelgen qonaqtar ýnıversıtet rektoryna alǵystaryn bildirdi.
Kezdesý sońynda Abaı atyndaǵy QazUPÝ men Almaty qalasynyń 13 mektebi arasynda «Pedagogıkalyq synyptar» jobasyn iske asyrý boıynsha yntymaqtastyq týraly Memorandýmǵa qol qoıyldy.