Bizdiń bankter taǵy bir klıent tolqynyn kútip otyr. Google Play-den reseılik MIR pay kartasynyń kózin qurtyp jatyr. Al Samsung Pay 3-shi sáýirden bastap Mir kartasyn qoldamaıdy, dep habarlaıdy almaty-akshamy.kz.
Kartany Qazaqstannan-aq ashyp alyp, qoldana berýge bolady ǵoı, degińiz kelip tur ǵoı... Alaıda, reseılik Banksta telegram arnasy UBS men Credit Suisse sanksıadan qaýiptenip, eki eldiń azamattyǵy bar (shveısarıalyq jáne reseılik) adamdardyń shottaryn jaba bastaǵanyn jazady.
Árıne, qazaqstandyq bankterdi shveısarıalyq banktermen salystyrýǵa kelmes, áıtkenmen, soǵys odan ári sozylýda, demek Ortalyq Azıa elderiniń bankteri de sansıa zardabyn tartýy ábden múmkin. Buǵan árıne, sanksıa salynbaǵan kompanıalarǵa qyzmet kórsetetin Qazaqstan men Reseı arasynda korporatıvtik operasıalardy júzege asyratyn bankterdi qosyp otyrǵan joqpyz.
Qytaı, BAÁ men Túrkıa eliniń bankteri sońǵy aptada sanksıany saqtaý talaptaryn kúsheıtken. Bul oqıǵa munaı jetkizý isinde Reseıge aqsha aýdarýdyń keshigýine nemese bas tartýyna alyp keldi, - dep habarlady Reuters.
BAÁ-degi First Abu Dhabi Bank jáne Dubai Islamic Bank reseılik taýarlardyń saýdasyna qatysty birneshe esepshotty buǵattady. BAÁ-degi Mashreq banki, túriktiń Ziraat jáne Vakifbank-teri, sondaı-aq qytaılyq ICBC men Bank of China tólemderdi óńdeý óte qıynǵa túsip jatqanyn aıtady.
Túrik bankteri qosalqy sanksıadan qaýiptenip, Reseıden kelgen tólemderdi qabyldamaı jatyr,-dep jazady Dünya. Eksporterlar jyl basynan beri aqshalaryn ala almaı jatqan kórinedi. Al bılik bolsa, buǵan «fors-majorlyq jaǵdaı» dep baǵa berýde.