Bakýda Qazaqstan-Ázerbaıjan saraptamalyq keńesiniń úshinshi otyrysy ótti
2024 jylǵy 13 naýryzda Ázerbaıjannyń jetekshi taldaý ortalyǵy – Halyqaralyq qatynastardy taldaý ortalyǵynda (HQTO) Qazaqstan-Ázerbaıjan saraptamalyq keńesiniń úshinshi otyrysy ótti, dep habarlaıdy almaty-akshamy.kz
İs-sharaǵa Qazaqstannyń Ázerbaıjandaǵy Elshisi Álim Baıel, Qazaqstan strategıalyq zertteýler ınstıtýtynyń dırektory Erkin Tuqymov, HQTO tóraǵasy Elshi Farıd Shafıev, dıplomattar, Ázerbaıjannyń saıasattaný, halyqaralyq qatynastar jáne ekonomıka salasyndaǵy jetekshi sarapshylary, sondaı-aq BAQ ókilderi qatysty. Kezdesýde Qazaqstan Respýblıkasy Parlamenti Májilisiniń depýtaty, Qazaqstan men Ázerbaıjan parlamentaralyq yntymaqtastyq tobynyń jetekshisi Aıdos Sarym, Qoldanbaly etnosaıası zertteýler ınstıtýtynyń dırektory Talǵat Qalıev jáne Túrki akademıasynyń bas sarapshysy Tımýr Kozyrev beınekonferensbaılanys arqyly qosylyp, sóz sóıledi.
Otyrys barysynda sarapshylar 2024 jylǵy 11-12 naýryzda Baký, Fızýlı jáne Shýsha qalalarynda ótken Qazaqstan Respýblıkasynyń Prezıdenti Q.K. Toqaevtyń Ázerbaıjanǵa eki kúndik memlekettik saparynyń nátıjelerine joǵary baǵa berdi. Kezdesýde ekijaqty saıası dıalogtyń joǵary deńgeıi barlyq salalar boıynsha yntymaqtastyqtyń ósýine yqpal etip otyrǵandyǵy, sondaı-aq energetıka jáne kólik salasyndaǵy birqatar birlesken strategıalyq jobalardy iske asyrýǵa serpin berip otyrǵandyǵy aıtyldy.
Osy turǵyda Álim Baıel Transkaspıı halyqaralyq kólik baǵyty (THKB), Kaspıı túbimen talshyqty-optıkalyq baılanys jelisin (TOBJ) tartý, qazaqstandyq munaı men ýrandy Ázerbaıjan aýmaǵy arqyly eksporttaý sıaqty óńirlik mańyzy bar iri jobalardyń tabysty júzege asyrylyp jatqanyn atap ótti. Dıplomat Ortalyq Azıadan Eýropaǵa Ázerbaıjan arqyly elektr energıasyn eksporttaý perspektıvalarynyń talqylana bastalǵanyna nazar aýdardy. Sonymen qatar, Á. Baıel bastapqy somasy 300 mln. AQSH dollary bolatyn birlesken ınvestısıalyq qor qurý týraly sheshimdi sapardyń jańalyǵy retinde atap ótti. Elshi Prezıdent Toqaevtyń qazaq-ázerbaıjan qatynastarynyń strategıalyq jáne odaqtas deńgeıge shyqqany týraly málimdemesine nazar aýdardy. Á. Baıel qazaq-ázerbaıjan qatynastarynyń ártúrli aspektileri jóninde saraptamalyq materıaldar jınaǵyn ázirleýdi usyndy.
Sarapshylar Túrki memleketteri uıymynyń jahandyq salmaǵynyń artqanyn jáne osy uıymǵa múshe elder arasyndaǵy ıntegrasıalyq prosesterdiń jedeldegenin atap ótti. Farıd Shafıev Qazaqstan tek sózben ǵana emes, is júzinde de Ázerbaıjanǵa óziniń aýmaǵyn qalpyna keltirý máselesinde jan-jaqty qoldaý kórsetip otyrǵanyn atap ótti. «Qazaqstan Prezıdenti Qasym-Jomart Toqaevtyń eki kúndik sapary aıasynda Shýshaǵa barýy, sondaı-aq Fızýlı qalasynda salynǵan Qurmanǵazy atyndaǵy balalar shyǵarmashylyǵy ortalyǵynyń ashylýy bosatylǵan jerlerde júrgizilip jatqan qalpyna keltirý-qurylys jumystaryna ashyq qoldaý kórsetý bolyp tabylady», - dep aıtty F.Shafıev.
Sonymen qatar, kezdesý aıasynda energetıkalyq, kólik-logıstıkalyq yntymaqtastyq, ǵylymı-saraptamalyq kooperasıa, mádenı-gýmanıtarlyq baılanystar jáne jastar saıasaty máseleleri boıynsha sarapshylardyń pikirleri tyńdaldy.