Otyrysta óńirlik qaýipsizdiktiń jańa jaǵdaılarynda ekstremızm men terorızm qaterlerine qarsy is-qımyl máseleleri qaraldy, dep habarlaıdy almaty-akshamy.kz
Qaýipsizdik Keńesiniń Tóraǵasy Aýǵanstanda bolyp jatqan oqıǵalarǵa baılanysty bul máseleniń ózektiligi arta túskenin atap ótti.
Nursultan Nazarbaev Aýǵanstandaǵy jaǵdaı búgingi tańda Ortalyq Eýrazıa keńistigindegi mańyzdy ózgeristerge túrtki bolyp, uzaq merzimdi syn-qaterler týdyryp otyrǵanyn aıtty. Osyǵan oraı óńirlik qaýipsizdiktiń qazirgi tetikterin nyǵaıtyp, jańa mehanızmder qalyptastyrý kerektigine toqtaldy.
Qazaqstannyń Tuńǵysh Prezıdenti ekstremızm men terorızm kórinisterine qarsy jan-jaqty daıyndyqty qamtamasyz etý kerektigine nazar aýdardy.
– Óńirlik qaýipsizdikke tóngen jańa syn-qaterler qorǵanys qabiletin odan ári kúsheıtý sharalaryn talap etip otyr. Qazaqstan armıasy zamanaýı ozyq standarttarǵa saı bolýǵa tıis. Qarýly kúshterdiń jańǵyrýyn, qorǵanys ónerkásibi kesheniniń damýyn aıqyndaıtyn barlyq bazalyq qujattar bekitildi. Qazirgi tańda eń bastysy – biz qabyldaǵan sheshimderdiń bári durys oryndalýyn qamtamasyz etý, – dedi Qaýipsizdik Keńesiniń Tóraǵasy.
Sondaı-aq, azamattardyń qaýipsizdigin arttyrý baǵytynda quqyq qorǵaý júıesinde júzege asyrylyp jatqan údemeli reformalardyń mańyzdylyǵy atap ótildi.
Elbasy qoǵamdaǵy tynyshtyq pen kelisim memlekettiń turaqty damýynyń negizi ekenine toqtalyp, ulttyq rýhanı keńistigimizdiń qaýipsizdigin qorǵaý mańyzdy ekenin aıtty.
Qaýipsizdik Keńesiniń Tóraǵasy memlekettiń turaqtylyǵynyń qoǵamdyq-saıası jáne áleýmettik-ekonomıkalyq bóligin únemi baqylaý qajet ekenin atap ótti.
– Azamattardyń naqty kirisin arttyrý, sapaly jumys oryndaryn ashý, shaǵyn jáne orta bıznesti damytý, azyq-túlik qaýipsizdigin qamtamasyz etý, osynyń bárine ekonomıkanyń ósimi arqyly qol jetkizemiz. Densaýlyq saqtaý men bilim berýdi qoldaý, azamattardyń ózekti máselelerin sheshý árdaıym memlekettik organdardyń basty nazarynda bolýǵa tıis. Munyń bári – qazaqstandyqtardyń áleýmettik ál-aýqaty men senimdiliginiń kepili. Ekstremızm men radıkalızmniń óristeýine jol berýge bolmaıdy, – dedi Qazaqstannyń Tuńǵysh Prezıdenti.
Jıynda Premer-Mınıstrdiń orynbasary – Syrtqy ister mınıstri M.Tileýberdiniń, Ulttyq qaýipsizdik komıtetiniń tóraǵasy K.Másimovtiń, Aqparat jáne qoǵamdyq damý mınıstri A.Balaevanyń baıandamalary tyńdaldy.
Otyrys qorytyndysy boıynsha Nursultan Nazarbaev óńirlik qaýipsizdik salasyndaǵy ulttyq múddemizdi qorǵaýǵa, azamattardyń qaýipsizdigin qamtamasyz etýge jáne qoǵamnyń ornyqty damýyna baǵyttalǵan birqatar naqty tapsyrma berdi.