Buǵan deıin ol Senat depýtaty bolǵan.
QR Prezıdenti Qasym-Jomart Toqaevtyń Jarlyǵymen Nurlan Májıtuly Ábdirov QR Ortalyq saılaý komısıasynyń Tóraǵasy laýazymyna taǵaıyndaldy, dep habarlaıdy Almaty-akshamy.kz Aqordaǵa silteme jasap.
Nurlan Ábdirov 1961 jylǵy 12 qańtarda týǵan.
KSRO İİM Qaraǵandy joǵary mektebin, KSRO İİM Búkilodaqtyq ǵylymı-zertteý ınstıtýtynyń kúndizgi adúnktýrasyn (Máskeý q.), Dj.Marshall atyndaǵy Qaýipsizdik máselelerin zerdeleý jónindegi Eýropalyq ortalyqta basshylyq quramnyń 4 aılyq kýrstaryn (Germanıa) bitirgen. Zańger-quqyqtanýshy. Zań ǵylymdarynyń doktory, profesor.
1982 jyldyń qyrkúıeginen 1997 jyldyń maýsymyna deıin İİM Qaraǵandy joǵary mektebinde oqytýshylyq qyzmet atqardy.
1997 jylǵy maýsymnan 2000 jylǵy mamyrǵa deıin — Qazaqstan Respýblıkasynyń Esirtkini baqylaý jónindegi memlekettik komısıasynyń hatshysy.
2000 jylǵy mamyrdan 2002 jylǵy qyrkúıekke deıin — QR Nashaqorlyqqa jáne esirtki bıznesine qarsy kúres agenttigi tóraǵasynyń orynbasary, QR Ádilet mınıstrliginiń Nashaqorlyqqa jáne esirtki bıznesine qarsy kúres komıteti tóraǵasynyń orynbasary.
2002 jylǵy qyrkúıekten 2005 jylǵy maýsymǵa deıin — Qaýipsizdik keńesi Hatshylyǵynyń memlekettik ınspektory, Qaýipsizdik keńesi Hatshylyǵy Qoǵamdyq jáne ekologıalyq qaýipsizdik bóliminiń meńgerýshisi, QR Qaýipsizdik keńesi Hatshylyǵy meńgerýshisiniń orynbasary.
2005 jylǵy maýsymnan 2009 jylǵy qyrkúıekke deıin — QR Qaýipsizdik keńesi Hatshysynyń orynbasary – Qaýipsizdik keńesi Hatshylyǵynyń meńgerýshisi. 2009 jylǵy qyrkúıekten 2020 jylǵy tamyzǵa deıin — Qazaqstan Respýblıkasy Parlamenti Májilisiniń tórtinshi, besinshi, altynshy saılanymdarynyń depýtaty, Zańnama jáne sot-quqyqtyq reforma komıtetiniń tóraǵasy.
2020 jylǵy tamyzda QR Prezıdentiniń Jarlyǵymen Parlament Senatynyń depýtaty bolyp taǵaıyndaldy. 2020 jylǵy qyrkúıekte Qazaqstan Respýblıkasy Parlamenti Senaty Tóraǵasynyń orynbasary bolyp saılandy.
«Parasat», «Qurmet» ordenderimen, TMD PAA-nyń «Sodrýjestvo» ordenimen, medaldarmen marapattalǵan.