Bıyl 1630 qandasqa túrli qoldaý sharalary kórsetilgen.
Eńbek mınıstrliginiń 2023 jylǵy 1 jeltoqsandaǵy málimetinshe, 19 476 etnıkalyq qazaq qandas mártebesin alǵan, dep habarlaıdy Almaty-akshamy.kz
Mınıstrliktiń aqparatyna saı, 1991 jyldan beri respýblıkamyzǵa 1 mln 126,5 myń etnıkalyq qazaq oralǵan.
Jyl basynan Qazaqstanǵa kelgen qandastardyń:
51,9%-y Ózbekstannan,
19,6%-y Qytaıdan,
10,8%-y Mońǵolıadan,
8,5%-y Túrikmenstannan,
7,2%-y Reseıden,
2%-y basqa elden kelgen.
Osy jylǵy 1 jeltoqsandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,5%, eńbekke qabiletti jastan kishi 30,9% jáne zeınetkerler 8,6% boldy.
"Eńbekke qabiletti jastaǵy qandastardyń ishinen bilim deńgeıi boıynsha 15,3%-y joǵary bilimdi, 33,6%-y orta kásibı bilimdi, 42,8%-y jalpy orta bilimdi, jáne 8,3%-nyń bilimi joq", delingen Eńbek jáne halyqty áleýmettik qorǵaý mınıstrligi taratqan aqparatta.
Vedomstvonyń málimetinshe, qonys aýdarǵan etnıkalyq qazaqtar respýblıkanyń túrli óńirlerine qonystanǵan. Sonymen birge qandastardy qonystandyrý úshin mynadaı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary.
Qonystandyrý óńirlerinde 2023 jylǵa arnalǵan qandastardy qabyldaý kvotasy 2 337 adamdy quraıdy. 2023 jylǵy 1 jeltoqsandaǵy jaǵdaı boıynsha qonystandyrý óńirlerine 2 053 qandas qonys aýdardy.
Joǵaryda atalǵan óńirlerde qonystanǵan qandastarǵa kóshýge sýbsıdıa túrinde memlekettik qoldaý sharalary usynylady:
bir mezgilde otaǵasyna jáne otbasynyń árbir múshesine 70 AEK (241,5 myń teńge) mólsherinde;
turǵyn úı jaldaýǵa jáne komýnaldyq qyzmetterge aqy tóleýge – bir jyl ishinde 15-ten 30 AEK (51,7-den 103,5 myń teńgege deıin) mólsherinde.
Mınıstrliktiń dereginshe, jyl basynan beri 1630 qandasqa túrli qoldaý sharalary kórsetildi. Atap aıtqanda, 614 adam turaqty jumysqa ornalastyryldy, 1630 adam birjolǵy sýbsıdıa aldy, al 513 qandasqa turǵyn úı shyǵyndary sýbsıdıalandy.
Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4 mln teńgege deıin mólsherinde birjolǵy óteýsiz jáne qaıtarymsyz negizde engizildi.
Vedomstvo osy jyly pılottyq rejımde Qazaqstan elshilikteri arqyly "bir tereze" qaǵıdaty boıynsha qandas mártebesin berý tetigi iske asyrylǵanyn eske saldy. Pılottyq joba sheńberinde elimizge barý, jumys orny, turǵyn úı berý múmkindikteri týraly máseleni sheshýge jáne respýblıka aýmaǵyna kirmeı-aq qandas mártebesin alýǵa bolady. Búgingi tańda respýblıkanyń shet elderdegi mekemeleri arqyly etnıkalyq qazaqtardan jańa formatta 2 058 ótinish (690 otbasy) qabyldandy.