Daǵdarys kezinde bul óte qajet ekeni anyq
14 shilde kúni Memleket basshysy QasymJomart Toqaev Úkimettiń keńeıtilgen otyrysyn ótkizdi. Úkimettiń bul otyrysyn ashyq áńgime dep ataýǵa bolady degen pikirin jetkizdi fılosofıa ǵylymynyń kandıdaty Jazıra Oshaqbaeva, dep habarlaıdy Almaty-akshamy.kz.
Onyń pikirinshe, Memleket basshysy ekonomıkamyzdyń kóptegen aýyr tustaryn aıta kelip, Qazaqstannyń jańa Úkimetiniń aldynda turǵan: ınflásıany jáne azyq-túlik taýarlarynyń baǵasyn turaqtandyrý, azamattardyń tabysyn arttyrý jáne adamı kapıtaldy damytý, aqsha-nesıe jáne salyqtyq-búdjet saıasatyn jetildirý, ekonomıkanyń naqty sektoryna qoldaý kórsetý, energetıkalyq qaýipsizdikti qamtamasyz etý, avtojol ınfraqurylymyn damytý sıaqty máseleler boıynsha naqty mindetter júktedi.
«Úkimettiń basty mindetteriniń biri – ana men bala densaýlyǵyn saqtaý. Ókinishke oraı, ana men sábı ólimi kóbeıdi. Densaýlyq saqtaý salasynda áli de sheshimin tappaǵan máseleler kóp. Qasym-Jomart Toqaevtyń aıtýynsha, perzenthanalardyń kópshiligi halyqaralyq standarttarǵa saı emes. Sondyqtan shuǵyl sharalar qabyldap, bul máseleni sheshý qajet. Jalpy, densaýlyq saqtaý salasynda túıtkildi máseleler kóp. Qazaqstanda sozylmaly aýrýlardan bolatyn ólim kórsetkishi óte joǵary. Prezıdent medısınalyq saqtandyrýdyń da durys jumys istemeıtindigin atap ótti, oǵan júz paıyz kelisemiz. Halyq saqtandyrý jarnasyn tóleýde, biraq tıesili qyzmetterdi tolyq ala almaı otyrmyz. Sonymen birge, El basshysy elge qaıtyp kelýge nıettengen qandastarǵa tolyq kólemde qoldaý kórsetiletinin, tek Mańǵystaý óńirimen shektelip qoımaı, basqa oblystarǵa, sonyń ishinde óndirisi damyǵan aımaqtarǵa da qonystandyrý qajettiligin atap ótti. Memleket basshysy Úkimettiń jumysyna ortasha degen baǵa berip, kúzge qaraı kadrlyq sheshim qabyldaýǵa týra kelýi múmkin ekenin eskertti. Daǵdarys kezinde bul óte qajet ekeni anyq», - deıdi Jazıra Oshaqbaeva.