Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Vashıngtonǵa sapary aıasynda AQSH Saýda ókili Ketrın Taımen kelissózder júrgizdi.
Kezdesý barysynda Mınıstr QR jańa Úkimetiniń basymdyqtary, saýda qatynastarynyń aǵymdaǵy serpini jáne óńirdegi azyq-túlik qaýipsizdigin qamtamasyz etý jónindegi sharalar týraly habardar etti.
M.Nurtileý Qazaqstan AQSH-tyń senimdi saýda seriktesi ekenin atap ótip, amerıkalyq Saýda ókilin Astana halyqaralyq forýmyna qatysýǵa shaqyrdy.
K.Taı Qazaqstan ekonomıkasynyń damý qarqynyn joǵary baǵalap, ekijaqty yntymaqtastyqty syndarly turǵyda qalyptastyrýǵa beıildiligin atap ótti.
Dúnıejúzilik saýda uıymy sheńberinde elimizdiń Qurama Shtattarymen ózara is-qımylynyń joǵary deńgeıine, sondaı-aq atalǵan uıymǵa óńir elderiniń kirý boıynsha Qazaqstannyń kúsh-jigerin qoldaýǵa erekshe nazar aýdaryldy.
Taraptar QR men óńirdiń tranzıttik-kóliktik baılanysyn damytý boıynsha joǵary áleýetti atap ótti.
Budan basqa Qazaqstan tarapynyń bastamasy boıynsha Ortalyq Azıa elderi men AQSH arasyndaǵy Saýda jáne ınvestısıalar jónindegi negizdemelik kelisim (TIFA) boıynsha keńestiń aldaǵy otyrysyn Astana qalasynda ótkizý týraly ýaǵdalastyqqa qol jetkizildi.
Suhbat sońynda taraptar ekijaqty jáne kópjaqty formatta negizgi máseleler boıynsha dıalogty jalǵastyrýǵa, sondaı-aq óńirlik jetkizý tizbegin nyǵaıtý úshin amerıkalyq seriktesterdiń tájirıbesin qoldanýǵa kelisti.
Sonymen qatar sapar barysynda QR SİM basshysy amerıkalyq «Wabtec» kompanıasynyń basshylyǵymen kezdesý ótkizip, onyń barysynda kólik jáne ónerkásip salasyndaǵy yntymaqtastyqty keńeıtý, Qazaqstanda kompanıanyń ınjenerlik ortalyǵyn ashý, sondaı-aq «Bolashaq» stıpendıalyq baǵdarlamasy boıynsha oqıtyn stýdentterge jumys tájirıbesin usyný perspektıvalary talqylandy.