Jeńimpazdarǵa kádesyılar jáne teatrǵa bıletter berildi
«Alatay aqparat» medıaholdınginiń uıymdastyrýymen ótken «Meniń anam!» taqyrybyndaǵy sýret baıqaýynyń jeńimpazdary marapattaldy, dep habarlaıdy Almaty-akshamy.kz.
Kishkentaı qylqalam sheberleri men ónerpazdardy quttyqtaý rásimine medıaholdıng basshylyǵy, baıqaýǵa seriktestik tanytqan teatrlardyń ókilderi jáne jeńimpazdar men olardyń ata-analary qatysty. Aıta ketsek, baıqaýǵa tek qana oqýshylar emes balabaqsha tárbıelenýshileri de qatysqan bolatyn. Qatysýshylar arasynda Almaty qalasynyń baldyrǵan ónerpazdarynan bólek, elordanyń kishkentaı turǵyndary da bar.
Ónerpazdardy marapattaý barysynda «Alatay aqparat» medıaholdıngi bas dırektorynyń orynbasary Dáýren Dúısebaev barlyq qatysýshylarǵa, ata-analarǵa balalardy qanattandyryp, ıgi sharalarǵa qatystyrýǵa atsalysqandary úshin alǵysyn jetkizdi.
«Ana taqyrybynda kishkentaı ónerpazdarymyz óte jaqsy sýretter salyp, vıdeolar túsirdi. Ana bárimiz úshin qashanda bıik tulǵa, uly esim. Biz analarymyzdy, arýlarymyzdy, qyzdarymyzdy qashanda qurmetteımiz. Aıaýly taqyrypqa arnalǵan baıqaýda qatysýshylarymyz ózderiniń ónerlerimen bólisti. Sábılik sezimderin sýretpen jetkizdi. Bul baıqaýdyń orny erekshe dep bilemin. Alda áli baıqaýlar bolady. Ónerlerińiz órge júzsin», - dedi Dáýren Dúısebaev.
Al medıaholdıngtiń komersıalyq dırektory Qýanysh Dúskalıev baldyrǵandarymyzdyń ónerlerine sáttilik tilep, baıqaýlarda júldege ıe bola bersin degen tilegin arnady jáne árqashan ónerpaz balalardy qoldap, olarǵa demeý bolýdy jalǵastyra berýdi jetkizdi.
Sýret salyp, óz ónerlerimen bólisken daryndy baldyrǵandardy marapattaý rásimine arnaıy kelgen, osy baqaýǵa seriktestik bildirgen Memlekettik qýyrshaq teatrynyń ókili Beıbit Álkeeva: «Bala boıyndaǵy talantty ashyp, ishtegi tunyp turǵan sheberliktiń qanat qaǵýyna múmkindik berip, balany jaqsyǵa beıimdeý bul – ata-ananyń úlken eńbegi. Balanyń jastaıynan ónerge qumar bolýy bolashaqta úlken belesterge jeteleıdi. Búgin osy sýret baıqaýyna qatysqan árbir bala talantty ári ónerli. Bolashaqta úlken belesterdi baǵyndyra bersin. Mádenı oshaq - teatrlarǵa kelip kókjıekterin damytyp, kózqarastaryn keńeıtsin. Biz jeńimpazdarǵa qoıylymdar kórýge arnaıy shaqyrtýlar usynyp kelip otyrmyz», - degen júrekjardy tilegin arnady.
«Meniń anam!» sýret baıqaýynda úzdik dep tanylǵan segiz jeńimpazǵa «Alatay aqparat» medıaholdınginiń atynan estelikke kádesyı ónimderi tabystalyp, baıqaýǵa seriktestik tanytqan Memlekettik qýyrshaq teatry men N.Sas atyndaǵy memlekettik akademıalyq balalar men jasóspirimder teatrynyń qoıylymdaryna bıletter berildi.
Balalarǵa rıasyz qýanysh syılaǵan baıqaýǵa tek jeńimpazdar ǵana emes, ata-analar da alǵystaryn jetkizdi.
Jeńimpazdardyń ata-analary atynan sóz alǵan Aqbota Jeńisqyzy: «Alyp shahardyń tynys-tirlishilignen aqparat taratyp otyrǵan «Almaty aqshamy» gazetiniń redaksıasynda bas qosyp, balalarymyzdy marapattap qýantyp jatyrsyzdar. Bul gazetti biz ózimiz de úzbeı oqıtyn oqyrmandardyń birimiz. Bunyń ózi balalarǵa úlken úlgi, tárbıe. Bıylǵy balalar jylynda baldyrǵandarymyzǵa qýanysh syılap, kishkentaı ónerpazdarymyzdyń tamshydaı ǵana ónerin, taýdaı baǵalap jatqan uıymdastyrýshylarǵa, «Alatay aqparat» medıaholdıngine alǵys aıtqymyz keledi», - degen oıyn jetkizdi.
Marapatta jeńimpazdar arnaıy estelik sýretterge túsip, alda ótkiziletin ózge de baıqaýlardy asyǵa kútetinderin ári qatysýǵa daıyn ekendikterin aıtyp jatty.
Buǵan deıin aıtqanymyzdaı, baıqaý medıaholdıngtiń ınstagramdaǵy @aqshamy.official resmı paraqshasynda ótti. Baıqaýdyń sharty boıynsha balalar «Meniń anam!» taqyryby aıasynda anasynyń sýretin salyp, vıdeo túsirdi.
Osy saıysqa atsalysyp, óz jumystaryn joldaǵan bizdiń jas sýretshilerimizge alǵys aıtamyz.
