Memlekettik qyzmetshiler – qoǵam ómirinde mańyzdy ról atqaratyn tulǵalar. Olardyń qyzmettik tártibi men ádebine joǵary talaptar qoıylady.
Qazaqstanda memlekettik qyzmetshilerdiń qyzmettik etıkasy Qazaqstan Respýblıkasy Prezıdentiniń 2015 jylǵy 29 jeltoqsandaǵy №153 Jarlyǵymen bekitilgen Memlekettik qyzmetshilerdiń Ádep kodeksimen retteledi. Bul qujat qoǵamnyń memlekettik organdarǵa degen senimin nyǵaıtýǵa, memlekettik qyzmette joǵary mádenıet pen parasattylyq atmosferasyn qalyptastyrýǵa, sondaı-aq ádepsiz minez-qulyqtyń aldyn alýǵa baǵyttalǵan. Kodekste belgilengen ádep standarttary barlyq memlekettik qyzmetshiler úshin mindetti bolyp tabylady.
Memlekettik qyzmetshilerdiń ádep qaǵıdattary:
🔹 Adal nıettilik – qoǵam ıgiligi úshin memleketke kásibı ári jaýapty qyzmet etý.
🔹 Adaldyq – óz mindetterine shynaıy kózqaraspen qaraý.
🔹 Ádildik – zań talaptaryn buljytpaı oryndap, sheshim qabyldaý kezinde obektıvti bolý.
🔹 Ashyqtyq – halyqpen keri baılanys ornatyp, qyzmetiniń ashyqtyǵyn qamtamasyz etý.
🔹 Sypaıylyq – azamattar men áriptesterge qurmetpen qaraý.
🔹 Klıentke baǵdarlaný – memlekettik qyzmet kórsetýdiń sapasyn arttyryp, búrokratıa men artyq áýre-sarsańǵa jol bermeý.
Sonymen qatar, memlekettik qyzmetshi kásibı bilim men iskerlik qasıetterdi meńgerýmen qatar, qarapaıym, ádepti, ádil bolýy, qyzmettik jaǵdaıyn jeke múddesine paıdalanbaýy jáne azamattardyń quqyqtaryna nuqsan keltiretin áreketterge qarsy turýy tıis. Sondaı-aq, ol qyzmetten tys ýaqytta da moraldyq-ádeptik normalardy saqtap, áriptesterimen iskerlik qarym-qatynas ornatýy qajet.
Árbir memlekettik qyzmetshi óz mindetin adal oryndap, zańdylyqty saqtaýǵa jáne qoǵamnyń damýyna úles qossa, halyqtyń bılikke degen senimi artyp, memlekettik qyzmettiń bedeli joǵarylaıtyny sózsiz.