Jasandy ıntellektini qoldaný aıasyn jáne ony damytýdyń mindetteri men quraldaryn aıqyndaıtyn strategıalyq qujat qabyldaý kerek. Bul týraly «Digital Bridge 2023» halyqaralyq tehnologıalyq forýmynda Memleket basshysy Qasym-Jomart Toqaev aıtty, dep habarlaıdy almaty-akshamy.kz.
«Jasandy ıntellektini qoldaný aıasyn jáne ony damytýdyń mindetteri men quraldaryn aıqyndaıtyn strategıalyq qujat qabyldaý kerek. Bul – halyqaralyq ozyq tájirıbe. Mundaı qadam elimizdi tehnologıalyq turǵyda damytýdyń ornyqty baǵytyn aıqyndaýǵa múmkindik beredi. Eń aldymen, jasandy ıntellekt tehnologıasyn ekonomıkamyzdyń munaı-gaz sektory, energetıka, aýyl sharýashylyǵy, kólik jáne logıstıka sekildi mańyzdy salalaryna engizýge mán berýimiz qajet dep sanaımyn. Jasandy ıntellekt qalalarymyzdy ómir súrýge jáne jumys isteýge qolaıly ári tolyqqandy aqyldy qalaǵa (smart city) aınaldyrý prosesin aıtarlyqtaı dárejede ońtaılandyra alady», - dedi Prezıdent.
Qasym-Jomart Toqaev memlekettik qyzmet kórsetý kezinde jasandy ıntellekt múmkindikterin keńinen paıdalanýdyń da mańyzy zor ekendigine nazar aýdartty.
«Bul oraıda biz eleýli nátıjege qol jetkizdik. Atap aıtqanda, azamattardyń áleýmettik ál-aýqatynyń deńgeıin anyqtaýǵa jáne olarǵa proaktıvti memlekettik qoldaý kórsetýge múmkindik beretin «Otbasynyń sıfrlyq kartasy» iske qosyldy. Mundaı ónimdi «Báıterek» holdıńi bazasynda bıznes úshin de engizý kerek. Meniń tapsyrmam boıynsha bul baǵytta aýqymdy sıfrlyq transformasıalaý jumystary bastalyp ketti», - dedi Memleket basshysy.