Ekijaqty qatynastardyń qazirgi jaǵdaıy men perspektıvalaryn talqylady.
Memleket basshysy Qasym-Jomart Toqaev Mysyr Arab Respýblıkasynyń Prezıdenti Ábdel Fattah as-Sısımen telefon arqyly sóılesti, dep habarlaıdy Almaty-akshamy.kz Aqorda saıtyna silteme jasap.
Mysyr tarapynyń bastamasymen uıymdastyrylǵan joǵary deńgeıdegi suhbat barysynda memleketter basshylary ekijaqty qatynastardyń qazirgi jaǵdaıy men perspektıvalaryn talqylady.
Qasym-Jomart Toqaev qazaq-mysyr qatynastarynyń tamyry tereń bolǵanymen, eki el arasyndaǵy zamanaýı dıplomatıalyq qatynastardyń ornaǵanyna bıyl 30 jyl ǵana tolǵanyn atap ótti. Osy merzim ishinde ekijaqty yntymaqtastyqtyń ártúrli salasy boıynsha birqatar jetistikterge qol jetkizildi. Degenmen, búgingi tańda eki el arasyndaǵy baılanystarynyń áleýeti tolyq paıdalanylmaı otyrǵanyna nazar aýdarǵan Qazaqstan Prezıdenti mysyr tarapyn saýda-ekonomıka salasyndaǵy yqpaldastyqty damytýǵa shaqyrdy.
Sonymen qatar, Memleket basshysy qańtar oqıǵalaryna qatysty alańdaýshylyq tanytyp, nıettestik bildirgeni úshin Ábdel Fattah as-Sısı men mysyr halqyna alǵysyn jetkizdi.
Qasym-Jomart Toqaev elimizdegi jaǵdaıdyń turaqtalǵanyn atap ótip, áleýmettik-ekonomıkalyq qaıta qurýdyń jańa strategıasyn júzege asyrý sharalary qabyldanǵanyna toqtaldy. Prezıdenttiń aıtýynsha, Qazaqstan halqy bolashaqqa nyq senimmen qaraıdy.
Suhbat sońynda Memleket basshysy Mysyr Prezıdentin Qazaqstanǵa ózine qolaıly merzimde saparlap kelýge shaqyrdy.