Vırtýaldy kezdesý eýropalyq taraptyń bastamasymen ótti
Ózara dostyq pen senimge negizdelgen áńgimelesý barysynda taraptar Qazaqstandaǵy qazirgi ishki saıası ahýaldy jáne Qazaqstan men Eýropalyq Odaq arasyndaǵy strategıalyq seriktestiktiń damý perspektıvalaryn talqylady, dep habarlaıdy Almaty-akshamy.kz Akorda.kz-ke silteme jasap
Sharl Mısheldiń ótinishi boıynsha Qasym-Jomart Toqaev elimizdegi qazirgi oqıǵalardyń sebepteri men qabyldanyp jatqan memlekettik sharalar jóninde málimet berdi. Prezıdent konstıtýsıalyq qurylysqa nuqsan keltirip, memlekettik tóńkeris jasaýǵa umtylǵan terrorıster men buzaqylardyń zorlyq-zombylyq áreketteri týraly aıtty.
Prezıdent bolǵan qaıǵyly oqıǵalardy asa aýyr agresıalyq akt jáne memlekettiligimizge jasalǵan qastandyq dep atady. Sondaı-aq lańkesterdiń zorlyq áreketteri saldarynan kóptegen quqyq qorǵaý qyzmetkerileri men beıbit turǵyndardyń qurban bolǵanyn, 1300-ge jýyq kásipkerlik nysanǵa zalal kelgenin, 100-den astam saýda ortalyǵy men bankterdiń tonalǵanyn, 500-ge jýyq polısıa mashınasy órtengenin aıtty. Qasym-Jomart Toqaevtyń baǵalaýynsha, memlekettiń aldyn ala ekonomıkalyq shyǵyny 2-3 mıllıard AQSH dollaryn quraıdy.
– Munyń terrorlyq shabýyl ekenine eshqandaı kúmánim joq. Bul – Qazaqstanǵa qarsy jaqsy uıymdasqan, ábden daıyndalǵan agresıalyq akt. Shabýyl jasaǵandardyń ishinde basym kópshiligi Ortalyq Azıa elderinen, onyń ishinde Aýǵanstannan kelgen sheteldik sodyrlar bar. Sonymen qatar arasynda Taıaý Shyǵystan kelgen sodyrlar da bar. Olardyń pıǵyly bizdiń aýmaqty baqylaýda ustaıtyn haos aımaǵyna aınaldyrý, sodan keıin bılikti basyp alý boldy. Sondyqtan Qazaqstanda lańkestikke qarsy operasıa bastaldy, – dedi Memleket basshysy.
Qasym-Jomart Toqaev el aýmaǵyna UQSHU-nyń bitimgerlik kúshteri quramynyń ornalastyrylýy jóninde naqty túsindirme jasady.
– Bitimgerlik kúshteri áskerı operasıalarǵa qatyspaıtynyn ashyp aıtqym keledi. Olardyń negizgi mindeti – Almaty qalasy men Qazaqstan astanasyndaǵy strategıalyq nysandardy qorǵaý. Bul qazaqstandyq kúshtik qurylymdardyń lańkesterge qarsy is-qımyldaryn júzege asyrýyna múmkindik beredi. UQSHU-nyń bitimgerlik kúshteri UQSHU Ujymdyq qaýipsizdik týraly sharttyń 2-shi jáne 4-shi baptaryna sáıkes ornalastyryldy. Olar Qazaqstandaǵy jaǵdaı tolyq turaqtanǵansha bolady, – dedi Qazaqstan Prezıdenti.
Memleket basshysy Qazaqstan óziniń halyqaralyq mindettemelerin saqtaýǵa beıil ekenin atap ótip, Eýropalyq Odaqtyń ınstıtýttarymen jáne oǵan múshe memlekettermen aradaǵy yntymaqtastyqty odan ári damytýǵa daıyndyǵyn naqtylady.
Qasym-Jomart Toqaevtyń málimetin muqıat tyńdaǵan Sharl Mıshel elimizdegi sońǵy oqıǵalar týraly egjeı-tegjeıli bilýge múmkindik bergen osy vırtýaldy kezdesýdiń zor paıdasy bolǵanyn aıtty. Ol Qazaqstandaǵy oqıǵalarǵa qatysty ártúrli túsindirmelerden góri osylaı shynaıy aqparat alýdyń mańyzdy ekenine toqtaldy.
– Biz Sizdiń elińizdiń egemendigi men aýmaqtyq tutastyǵyn qoldaımyz. Qazaqstanmen aradaǵy yntymaqtastyqty odan ári nyǵaıtýǵa daıynbyz, – dedi Eropalyq keńestiń prezıdenti.
Kelissóz qorytyndysy boıynsha taraptar syrtqy qurylymdar deńgeıinde turaqty baılanys jasap turýǵa ýaǵdalasty.