Búginginde park aýmaǵynda 2 kompanıa jolaýshylar tasymalymen aınalysyp jatyr
Kásipkerlerge elektr kólikterimen tasymaldaýdy júzege asyrý úshin «Medeý» parkimen kelisim jasaý usynyldy. Bıznes ókilderi bul bastamany prokýratýramen birlesip, Almaty qalasynyń kásipkerler palatasy alańynda talqylady, dep habarlaıdy Almaty-akshamy.kz.
Almaty kásipkerler palatasynyń ákimshilik kedergilerdi azaıtý bóliminiń bastyǵy Nurbol Asherbekov jıyndy asha otyryp, elektr karlardyń memlekettik organdarmen erekshe qorǵalatyn aýmaqtyń ashyq aımaǵyna kirýin shekteý máselesi birneshe ret talqylanǵanyna qaramastan, másele áli de ashyq kúıinde qalyp otyrǵanyn atap ótti.
«Taraptardyń birneshe ret kelissózderinen keıin prokýratýra, «Medeý» parki jáne Almaty kásipkerler palatasynyń ókilderi memorandýmǵa qol qoıý týraly sheshim qabyldady», – dedi spıker.
Bul kelisim erikti jáne kásipkerlerdiń quqyǵy men mindetterin qamtıdy. Prokýratýra ókili memorandým barlyq kásipkerlermen jasalatynyn atap ótti.
«Park basshylyǵynyń aýmaqqa kirýge qatysty zańsyz áreketteriniń bolǵanyn rastaımyz. Biz jasyl ekonomıka basqarmasymen, «Medeý» parkiniń basshylyǵymen kelissóz júrgizdik jáne bul memorandým ynta bildirgen barlyq kásipkermen jasalady degen kelisimge keldik», – dedi prokýratýra ókili Svetlana Kım.
Qujatty ázirleýshiler memlekettik organdardń tarapynan kásipkerlerdiń qyzmetine aralasý bolmaıtynyn aıtty. Bul bastama parkkke kiretin mashınalarǵa qatysty usynyldy:
«Eshkim park aýmaǵyna kirý ýaqytyn jáne parkke ákelingen adamdardyń sanyn belgilemeıdi. «Erekshe qorǵalatyn tabıǵı aýmaqtar týraly» zań bar, oǵan sáıkes kásipkerler, mysaly, tastalǵan qoqys, ruqsat etilmegen avtoturaqtar úshin jaýap beredi», – dep túsindirdi prokýratýra ókili.
Búgingi tańda park aýmaǵynda 2 kompanıa jolaýshylar tasymalymen aınalysyp jatyr, taǵy 5 kompanıa memorandýmǵa qol qoıyp, jaqyn arada jumysyn bastaıdy.
Tasymaldaýshylar bolsa memorandým kedergi bolady dep sanaıdy. Óıtkeni park jetekshiligi avtoturaq oryndaryn baqylaı almaıdy.
«Almatyda qazir elektr mashınalarǵa trend júrip jatyr. Búginde «Medeý» parkinde tirkelgen kólik sany 600-ǵa jýyq. Byltyr ǵana bul kórsetkish 60 mashına aınalysynda bolǵan. Eki jyldan keıin kórsetkish 10 myń birlikke deıin jetýi múmkin. Osyndaı aǵyndy park qalaı baqylaı alady?», – dep suraq qoıdy Blu Sky JSHS tasymaldaýshy kompanıanyń ókili.
«Medeý» ulttyq parki dırektorynyń orynbasary Almas Attaphanov aýmaqta turaq oryndarynyń sany shekteýli ekenin rastady. Elektromobılderdiń bir bóligi «Medeý» parki arqyly «Shymbulaq» taý shańǵy kýrortynyń meıramhanalaryna tranzıtpen ótedi.
«Eger demalys kúnderi barlyǵy jappaı kirse, onda kólikterdi jup jáne taq sandar boıynsha kirgizý týraly oılaný kerek shyǵar? Qazir mundaı másele turǵan joq. Óıtkeni mundaı aǵyn ázirge joq. Keler shaqta bul máselege qaıta oralýymyz kerek», – dedi Nurbol Asherbekov.