Aýdannyń ınjenerlik jelilerin jańǵyrtý negizgi máseleniń biri bolyp otyr.
Turǵyndarmen kezdesýde Erbolat Dosaev turǵyndardyń ótinishi boıynsha Qulager shaǵyn aýdanyndaǵy jylýmen jabdyqtaý jelilerin rekonstrýksıalaý jumystaryn tezdetý týraly másele kóterdi, dep habarlaıdy Almaty-akshamy.kz
Ákimniń aıtýynsha, 1,7 km jelini jańǵyrtý qazan aıynyń sońynda aıaqtaldy.
Qubyrlar jer astyna aýystyryldy, asfált qalpyna keltirildi, eski jerústi qubyrlary bólshektep alyndy. Qazybaev kóshesi, Rysqulov dańǵyly, Tátibekov kóshesi, Raıymbek dańǵyly bóligindegi uzyndyǵy 57,9 km sýmen qamtý jelilerin rekonstrýksıalaý jáne káriz salý jumystary aıaqtalyp keledi.
«Tamyz aıynda Palladın – Pavlodar – Selskaıa – Boraldaı kósheleri men Kemel shaǵyn aýdanynda 40 km eskirgen jelilerdi rekonstrýksıalaý jumystary bastaldy. Qazirdiń ózinde 800 tirek ornatylyp, 15,8 km kabel tartyldy. Bul kóshelerdegi jumystar jyl sońyna deıin, Kemel shaǵyn aýdanyndaǵy jumystar 2023 jyldyń sáýir aıynda aıaqtalady. Bul 4000-nan astam abonentti úzdiksiz elektrmen qamtamasyz etedi. Jyl sońyna deıin Jetisý aýdanynyń 76 kóshesinde syrtqy jaryqtandyrý jumystary aıaqtalady», dedi qala basshysy Erbolat Dosaev turǵyndarmen kezdesýde.