Aqparat jáne qoǵamdyq damý mınıstrligi «Mass-medıa týraly» zań jobasynyń tujyrymdamasyn ázirledi.
Zań buqaralyq aqparat quraldary salasyndaǵy qoǵamdyq qatynastardy retteıdi, teleradıo habarlaryn taratý sýbektileriniń quqyqtary men mindetterin jáne Konstıtýsıaǵa sáıkes buqaralyq aqparat quraldary bostandyǵynyń memlekettik kepildikterin belgileıdi, dep habarlaıdy Almaty-akshamy.kz.
Qujatta atap ótilgendeı, sóz, shyǵarmashylyq, óz kózqarastary men senimderin baspa jáne ózge de nysanda bildirý, aqparatty zańmen tyıym salynbaǵan kez kelgen tásilmen alý jáne taratý bostandyǵyna QR Konstıtýsıasy kepildik beredi.
Senzýraǵa tyıym salynady.
Memlekettik organdar, qoǵamdyq birlestikter, laýazymdy adamdar, mass-medıa árbir azamatqa óziniń quqyqtary men múddelerin qozǵaıtyn qujattarmen, sheshimdermen jáne aqparat kózderimen tanysýǵa múmkindik berýge mindetti.
Bul rette buqaralyq aqparat quraldary terorızmge qarsy is-qımyldy júzege asyratyn memlekettik organdarǵa járdemdesýge mindetti.
Buqaralyq aqparat quraldarynyń negizgi prınsıpteri:
- aqparatty erkin alý jáne zańdarda tyıym salynbaǵan kez kelgen tásilmen taratý quqyqtarynyń konstıtýsıalyq kepildikterin, sóz jáne shyǵarmashylyq bostandyǵyn qamtamasyz etý;
- jeke tulǵanyń, qoǵamnyń jáne memlekettiń aqparattyq egemendigi men aqparattyq qaýipsizdigin qamtamasyz etý;
- jeke jáne zańdy tulǵalar quqyqtarynyń teńdigi;
- taratylatyn aqparattyń zańdylyǵy men durystyǵyn qamtamasyz etý;
- obektıvtilikti qamtamasyz etý;
- buqaralyq aqparat quraldarynyń, jeke jáne zańdy tulǵalardyń qyzmetterin tutynýshylardyń quqyqtary men zańdy múddelerin qorǵaý;
- buqaralyq aqparat quraldaryn damytý úshin teń múmkindikterdi qamtamasyz etýde kórinetin adal básekelestik;
- Qazaqstan aýmaǵynda teleradıo habarlaryn taratý salasyndaǵy ulttyq standarttar negizinde teleradıo habarlaryn taratý salasyndaǵy qaýipsizdikti, senimdilikti jáne sapany qamtamasyz etý;
- otandyq tele-radıoarnalardy damytý, otandyq tele- radıobaǵdarlamalardy shyǵarý jáne taratý úshin jaǵdaılar jasaý;
- buqaralyq aqparat quraldary salasyndaǵy qyzmettiń jarıalylyǵy men ashyqtyǵy.
- kásibı jáne etıkalyq minez-qulyq normalaryn saqtaý;
- azamattyń jeke ómirin, ar-namysyn, qadir-qasıetin qurmetteý;
- aqparatqa teń qol jetkizýdi qamtamasyz etý;
- otandyq buqaralyq aqparat quraldarynyń básekege qabilettiligin yntalandyrý;
- qoǵamdyq qaýipsizdikti qamtamasyz etý.
AQDM túsindirgendeı, qoldanystaǵy «Buqaralyq aqparat quraldary týraly» zań túbegeıli eskirgen, qazirgi zamannyń syn-tegeýrinderine sáıkes kelmeıdi jáne buqaralyq aqparat quraldary salasyndaǵy qoǵamdyq qatynastardyń qazirgi zamanǵy talaptaryn tolyq qanaǵattandyrmaıdy. Sondyqtan sóz bostandyǵy quqyǵyn nyǵaıtýǵa jáne qamtamasyz etýge baǵyttalǵan, sondaı-aq bul quqyqty, eń aldymen, ǵalamtor jelisiniń qazaqstandyq segmentinde shekteý sharttaryn qamtıtyn memlekettiń jańa qaǵıdattary men kepildikterine negizdelgen zań qabyldaý qajet.
Osylaısha, sóz bostandyǵy, pikir plúralızmi men memlekettik qaýipsizdikti, qoǵamdyq tártipti, halyqtyń densaýlyǵy men ımandylyǵyn qamtamasyz etýge baǵyttalǵan qajetti shekteýler arasyndaǵy tepe-teńdikti belgileıtin túbegeıli jańa sqemany bekitý usynylady.
AQDM atap ótkendeı, negizgi reformalar jýrnalıserdiń quqyqtyq mártebesin arttyrýǵa jáne olar úshin quqyqtyq kepildikterdi kúsheıtýge baǵyttalady.
Zań jobasy men tujyrymdamasy 27 qańtarǵa deıin Ashyq NQA saıtynda ornalastyrylǵan.