Azyq-túlik taýarlary baǵasy Memleket basshysynyń baqylaýynda.
QR Premer-mınıstri Asqar Mamın Úkimettiń Sıfrlyq ofısinde ortalyq memlekettik organdardyń basshylarynyń jáne óńirler ákimderiniń qatysýymen áleýmettik mańyzy bar azyq-túlik taýarlarynyń baǵasyn retteý máseleleri boıynsha keńes ótkizdi, dep habarlaıdy Almaty-akshamy.kz
Úkimettiń resmı saıtyna silteme jasap.
Saýda jáne ıntegrasıa mınıstri Baqyt Sultanov, Aýyl sharýashylyǵy mınıstri Erbol Qarashókeev, «Azyq-túlik kelisim shart korporasıasy» UK» AQ basqarma tóraǵasy Saparhan Omarov, Ulttyq bank tóraǵasynyń orynbasary Álıa Moldabekova, Básekelestikti qorǵaý jáne damytý agenttiginiń tóraǵasy Serik Jumanǵarın, Nur-Sultan qalasynyń ákimi Altaı Kólginov, Qaraǵandy oblysynyń ákimi Jeńis Qasymbek, Almaty oblysynyń ákimi Amandyq Batalov aǵymdaǵy jaǵdaı men atqarylyp jatqan jumystar týraly baıandady.
Áleýmettik mańyzy bar azyq-túlik taýarlary baǵasynyń ósýine jol bermeý máselesi Memleket basshysy Qasym-Jomart Toqaevtyń erekshe baqylaýynda. Azyq-túlik baǵasy – bul áleýmettik ózekti másele. Úkimet Inflásıaǵa qarsy den qoıý sharalarynyń keshenin, birinshi kezekte AÓK sektoryndaǵy qundy qalyptastyrýdyń búkil tizbegi boıynda baǵalardy turaqtandyrý boıynsha iske asyrady, - dedi A. Mamın.
Negizgi agrarlyq elderdegi, onyń ishinde QR-daǵy qolaısyz klımattyq jaǵdaılar negizgi aýyl sharýashylyǵy daqyldarynyń shyǵymdylyǵynyń tómendeýine alyp keldi. Osyǵan baılanysty baǵanyń ósýi, sondaı-aq kórshi elder tarapynan aýyl sharýashylyǵy ónimine suranystyń artýy baıqalady.
Bıyl 8 aıda áleýmettik mańyzy bar azyq-túlik taýarlary baǵasynyń ósýi 9,7% qurady. Sońǵy aıda baǵanyń 0,7 paıyzdyq tarmaqqa tómendeýi baıqalady.
Inflásıaǵa qarsy den qoıý sharalary aıasynda 2021 jyly «Azyq-túlik kelisim shart korporasıasy» UK» AQ 87 mlrd teńgege (2020 jyly – 40 mlrd teńgege) aýyl sharýashylyǵy ónimderin satyp alýdy josparlap otyr. Bul rette satyp alynatyn daqyldardyń tizbesi 4-ten 9-ǵa deıin keńeıtildi: jumsaq bıdaı, qatty bıdaı, arpa, suly, kúnbaǵys, raps, zyǵyr, soıa, qaraqumyq. Atalǵan ónimder ishki naryqty qamtamasyz etý úshin, onyń ishinde un tartý kásiporyndaryna, qus jáne mal sharýashylyǵy sharýashylyqtaryna ótkizý úshin paıdalanylatyn bolady.
Básekelestikti qorǵaý jáne damytý agenttigi baǵany tómendetý týraly 68 habarlama shyǵardy, 8 tergeý taǵaıyndaldy. Nur-Sultan jáne Almaty qalalarynda, Qostanaı, Qaraǵandy, Atyraý, Mańǵystaý, Batys Qazaqstan jáne Shyǵys Qazaqstan oblystarynda ÁMAT-ta saýda ústemesinen asyp ketýdiń jáne syıaqy alýdyń 46 faktisi anyqtaldy. Osy óńirlerdiń basshylaryna shekti saýda ústemesinen asyra belgilegen saýda sýbektilerin jaýapkershilikke tartý jóninde shuǵyl sharalar qabyldaý qajettigi atap ótildi.
Jalpy, Premer-mınıstr ákimdikter men mınıstrlikterge Inflásıaǵa qarsy den qoıý sharalary kesheniniń ýaqtyly jáne tolyq oryndalýyn qamtamasyz etýdi tapsyrdy.
Egin jınaý maýsymynyń aıaqtalýyna baılanysty ákimdikterge «aınalym sqemasy» boıynsha qosymsha qarjylandyrý bólýdi jedeldetý jáne óńirlik turaqtandyrý qorlaryna buryn jetkizilgen azyq-túlik kólemin satyp alýdy júzege asyrý tapsyryldy. Bul rette forvardtyq satyp alý sheńberinde astyq jetkizý boıynsha «Azyq-túlik korporasıasy» UK» AQ aldynda aýyl sharýashylyǵy taýaryn óndirýshilerdiń mindettemelerin oryndaýdy qamtamasyz etý mindeti qoıyldy.