Májilistiń Ekologıa máseleleri jáne tabıǵat paıdalaný komıtetiniń keńeıtilgen taqyryptyq otyrys ótti, dep habarlaıdy Májilistiń baspasóz qyzmeti.
Jıynnyń basty maqsaty – otandyq gaz salasynyń jaǵdaıyn talqylaý, Memleket basshysy Q.K. Toqaevtyń VIII shaqyrylymnyń birinshi sesıasynyń ashylýynda bergen tapsyrmasyn júzege asyrý.
İs-sharaǵa Májilis depýtattarymen qatar Energetıka mınıstrliginiń jáne «QazaqGaz» ulttyq kompanıasynyń basshylary qatysty.
Otyrysty ashqan komıtet tóraǵasy Edil Jańbyrshın depýtattardy mınıstrliktiń jáne «QazaqGaz» ulttyq kompanıasynyń ótken kezeńdegi qyzmetiniń qorytyndylarymen tanystyryp qana qoımaı, odan ári damýdy talap etetin máselelerdi qarastyrý ekenin aıtty.
Energetıka mınıstri Almasadam Sátqalıev ótken jyly gaz salasynda reforma júrgizilgenin baıandap, jer qoınaýyn paıdalaný salasynda jaqsartylǵan modeldik kelisimshart qabyldanǵanyn aıtty.
Qabyldanǵan reformalar gazdyń resýrstyq bazasyn ulǵaıtýǵa jáne gaz salasyna ınvestısıalar tartýǵa baǵyttalǵan. Nátıjesinde biz 2029 jylǵa qaraı shamamen on mıllıard tekshe metr gazdyń qosymsha ósimin kútemiz, – dedi mınıstr.
Sonymen qatar A. Sátqalıev búgingi tańda QazaqGaz Qashaǵan ken ornynda qýaty jylyna bir mıllıard tekshe metr bolatyn gaz óńdeý zaýytyn salyp jatqanyn, sondaı-aq, Memleket basshysynyń tapsyrmasy boıynsha Mańǵystaý oblysynyń Jańaózen qalasyndaǵy «Qazaq gaz óńdeý» zaýytynyń bazasynda jańa gaz óńdeý zaýytyn salý týraly sheshim qabyldanǵanyn aıtty. Zaýyttar jospar boıynsha 2025 jyly paıdalanýǵa beriledi.
Mınıstrdiń aıtýynsha, jalpy gaz salasynyń ınvestısıalyq tartymdylyǵyn arttyrý jáne eldiń energetıkalyq qaýipsizdigin qamtamasyz etý maqsatynda Energetıka mınıstrligi osy jyly Ulttyq ekonomıka mınıstrligimen kelisim boıynsha gazǵa kóterme baǵany 5 jyl ishinde kezeń-kezeńimen ulǵaıtýdy josparlap otyr.
2023 jylǵy 1 shildeden bastap 2024 jylǵy 30 maýsymǵa deıin halyq úshin gazdyń bólshek baǵasynyń ósýi el boıynsha 1-3 teńgeni quraıdy, al iri komersıalyq tutynýshylar men sıfrlyq maınıngti júzege asyratyn tulǵalar úshin gazdyń ortasha bólshek baǵasy bir tekshe metr úshin 33 teńgeni quraıdy, – dedi mınıstr.
Al bólshek saýda baǵalaryn 1 lıtr úshin 50-70 teńgege memlekettik retteý nátıjesinde ótken jyly suıytylǵan munaı gazyn ishki tutyný 2021 jylmen salystyrǵanda 400 myń tonnaǵa nemese 28 paıyzǵa ósken.
Odan ári «QazaqGaz»UK» basqarma tóraǵasy Sanjar Jarkeshov gaz salasyndaǵy jaǵdaı týraly baıandama jasady.
Ótken jyly elimizde gaz tutynýdyń eń joǵary deńgeıi tirkeldi. Boljam boıynsha 2030 jylǵa qaraı taýarlyq gazdyń boljamdy tutynylýy 44 mlrd tekshe metrge jetýi múmkin, al resýrstyq baza bar bolǵany 35 mlrd tekshe metr bolady. Osy oraıda gaz salasyna júıeli reformalar qajet, – dedi basqarma tóraǵasy.
Otyrys barysynda Dúısenbaı Turǵanov, Samat Musabaev, Ajar Saǵyndyqova, Baýyrjan Smaǵulov, Arman Qalyqov, Erbolat Satybaldın, Aıan Zeınýllın tıisti organ basshylaryna gaz salasynda qordalanǵan máselelerge qatysty suraqtaryn qoıdy.
Jıyndy qorytyndylaǵan Edil Jańbyrshın taýarlyq jáne suıytylǵan gazdyń resýrstaryn ulǵaıtý, eldi gazben qamtamasyz etý, gaz salasyndaǵy ınvestısıalyq tartymdylyqty arttyrý, alaýlarda ilespe gazdy jaǵýdy jáne keri aıdaýdy qysqartýǵa yntalandyrýshy tásilder keshenin ázirleý qajet ekenin atap ótip, memlekettiń energetıkalyq qaýipsizdigin qamtamasyz etý eń basty mindet ekenin aıtty.