Qarasha aıynda magıstratýraǵa túsýge arnalǵan keshendi testileýge 9 myńnan astam ótinish qabyldandy
4 myńnan astam adam magıstratýraǵa túsýge arnalǵan keshendi testileýden ótip jatyr. Bul týraly Almaty-akshamy.kz Ulttyq testileý ortalyǵyna silteme jasap habarlaıdy.
Keshendi testileýdi tapsyrýǵa ótinish qabyldaý 1-18 qarasha aralyǵynda QR ǴJBM Ulttyq testileý ortalyǵynyń saıtynda app.testcenter.kz júzege asyryldy.
Qarasha aıynda magıstratýraǵa túsýge arnalǵan keshendi testileýge 9 myńnan astam ótinish qabyldandy. Emtıhan búgin bastalyp, 1 jeltoqsanǵa deıin (qosa alǵanda) jalǵasady.
Magıstratýraǵa túsý formatyna keletin bolsaq, bıyl eshqandaı ózgeris joq. Sondaı-aq onlaın-apellásıa berýge bolady. Tehnıkalyq aqaýlyqtar týyndaǵan jaǵdaıda oqýǵa tapsyrýshy apelásıaǵa testileý kezinde, al testileý nátıjelerimen kelispegen jaǵdaıda emtıhan aıaqtalǵannan keıin 30 mınýt ishinde beredi. Apelásıa qarastyrylǵan soń sertıfıkat oqýǵa túsýshiniń Jeke kabınetinde qoljetimdi bolady.
«Ǵylymı-pedagogıkalyq sala boıynsha magıstratýraǵa túsýge arnalǵan keshendi testileý úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Shet tilin meńgergenin rastaıtyn halyqaralyq sertıfıkattary bar oqýǵa túsýshiler shet tili boıynsha test tapsyrýdan bosatylady», – dedi Ulttyq testileý ortalyǵynyń dırektory Rýslan Emelbaev.
Shetki baldar ózgerissiz qaldy: ǵylymı-pedagogıkalyq magıstratýraǵa túsý úshin 75 bal, beıindik magıstratýraǵa túsý úshin 50 bal jınaý qajet.
Jazdaǵy testileýde erejeni buzǵany úshin testileýge jiberilmegen, sondaı-aq nátıjeleri joıylǵan tulǵalar keshendi testileýge qaıta qatysýǵa jiberilmeıtinin atap ótken jón.
Magıstratýraǵa túsýshiler 4 myńǵa jýyq memlekettik bilim grantyna úmitker bola alady.