Ǵylymı zertteýler júrgizilýde
Kútim balyǵy Qazaqstannyń qyzyl kitabynan shyǵarylýy múmkin. Bul jaıynda Májilis depýtattarynyń saýalyna QR Ekologıa, geologıa jáne tabıǵı resýrstar mınıstriniń mindetin atqarýshy Álıa Shalabekovanyń jaýabynda aıtylǵan, dep habarlaıdy Almaty-akshamy.kz QazAqparat-qa silteme jasap.
«Ósimdikter men janýarlardyń sırek kezdesetin jáne quryp ketý qaýpi tóngen túrleriniń tizbesin bekitý týraly» QR Úkimetiniń 2006 jylǵy 31 qazandaǵy № 1034 qaýlysymen kútim balyǵy sırek kezdesetin jáne quryp ketý qaýpi tóngen janýarlar túrleriniń tizbesine engizilgen», -dedi ol jaýabynda.
Onyń atap ótýinshe, «Janýarlar dúnıesin qorǵaý, ósimin molaıtý jáne paıdalaný týraly» QR Zańynyń 3-babynyń 2-tarmaǵyna sáıkes janýarlar túrlerin sanattarǵa jatqyzý jáne olardy bir sanattan basqasyna aýystyrý janýarlar dúnıesiniń túrlik sanalýandyǵyn saqtaý, olardy qorǵaý, ósimin molaıtý jáne ornyqty paıdalaný maqsatynda bıologıalyq negizdeme negizinde vedomstvoaralyq zoologıalyq komısıanyń usynymy boıynsha júrgiziledi.
«Óz kezeginde, 2022 jyldyń basynan beri «Kaspıı teńiziniń qazaqstandyq bóligindegi bıologıalyq resýrstardyń jaǵdaıyn baǵalaý boıynsha keshendi teńiz zertteýlerin júrgizý» búdjettik baǵdarlamasy aıasynda Kaspıı teńizinde mamandyrylǵan ǵylymı uıymmen tıisti ǵylymı zertteýler júrgizilýde. Onyń ishinde kútim balyǵyn tizbeden shyǵarý boıynsha jumystar qarastyrylǵan jáne zertteýlerdi shilde aıynda aıaqtaý josparlanyp otyr. Ǵylymı uıym tıisti qorytyndy usynǵan jaǵdaıda qoldanystaǵy zańnama aıasynda mınıstrlik kútim balyǵyn tizbeden shyǵarý boıynsha tıisti sheshimder qabyldaıtyn bolady», - dedi Álıa Shalabaeva.