Quzyrly organnan platformanyń sanany ýlaıtyn jarnamasyn tekserýdi suraǵan
Bas prokýratýra «Kúndelik» júıesin qatań synaǵan depýtat Erlan Saıyrovqa jaýap berdi, dep habarlaıdy almaty-akshamy.kz Qaz365.kz-ke silteme jasap.
Májilismen budan buryn Oqý-aǵartý mınıstrligi «osy sheteldik júıe úshin jylyna 800 mln teńge jumsap otyr degen aqparatty tekserýdi» talap etken. Quzyrly organnan platformanyń sanany ýlaıtyn jarnamasyn tekserýdi suraǵan.
Eske sala ketsek, buǵan deıin Erlan Saıyrov Premer-mınıstrdiń orynbasary Tamara Dúısenovaǵa, Bas prokýror Berik Asylovqa saýal joldap, joba arqyly 4 mıllıon qazaqstandyq oqýshynyń jeke málimetterin jınaý, saqtaý jáne óńdeý qyzmetin eshqandaı irikteý men baıqaýsyz, sheteldik kompanıaǵa 12 jylǵa berilip ketkenin habarlaǵan edi. Onyń sózinshe, bul salada shetelden basqarylatyn qoldan jasalǵan monopolıa paıda bolǵan. Depýtat syrtqy monopolıa kúshimen Qazaqstannyń barlyq balalary, muǵalimderi men ata-analary (jalpy sany 7 mıllıon adam) memleket paıdalanýǵa mindettegen «Kúndelikten» kúndelikti jaǵymsyz jarnama kórýge májbúr ekenin atap ótedi.
«Bul az bolǵandaı, «Kúndelik» júıesi «Ulttyq aqparattyq tehnologıalar» atty memlekettik mekemeniń serverlerin paıdalanady jáne ol úshin Oqý-aǵartý mınıstrligi jyl saıyn 800 mln teńge qarjy tóleıdi degen aqparatty Bas prokýratýra tekserýi qajet», - dedi depýtat.
Saıyrov «qazaqstandyqtardyń málimetteri joǵalsa, jarnama berýshilerge satylsa nemese astyrtyn zıandy jolmen qoldanylsa, kim jaýap beredi?» dep dabyl qaqqan.
Alaıda Bas prokýratýra «Kúndelik» júıesiniń jarnamasy tekserilgenin, olardyń bul áreketi memlekettik-jekeshelik áriptestik týraly zańnamanyń talaptaryna qaıshy kelmeıtinin habarlaǵan.
«Sondaı-aq «Ulttyq aqparattyq tehnologıalar» AQ (budan ári – «UAT» AQ) resýrstarynda «Kúndelik» AJ ornalastyrýǵa jyl saıyn server usynǵany úshin qarajat bólinetinin habarlaımyz. Bıyl 309 mln 893 myń teńge, 2022 jyly - 259 mln teńge bólindi. Bul qarjylandyrý sıfrlyq damý jáne aeroǵarysh ónerkásibi mınıstrliginiń Telekomýnıkasıalar komıteti men «UAT» AQ arasynda hostıng usyný boıynsha qyzmetter kórsetýge arnalǵan shartta kózdelgen», - dep habarlaıdy quzyrly organ.
Bas prokýratýra Ulttyq ekonomıka mınıstrligi ýákiletti organ retinde «Kúndelik» elektrondy jýrnaldary men kúndelikteriniń jobalaryna salalyq saraptamanyń oń qorytyndysyn bergenin eskertedi. Qazir eldegi memlekettik mektepterde 4 sıfrlyq bilim berý platformasy qoldanylatynyn jetkizdi.
«Kúndelik» AJ 15 óńirde paıdalanylady, qalǵan óńirlerde jergilikti atqarýshy organdar ózge de sıfrlyq bilim berý platformalaryn («Edus mektep», «Bilim All» «Bilim class») derbes aıqyndady. Tıisinshe, bilim berý platformalarynyń balama nusqalary bar. «Kúndelik» AJ jumys isteýine qatysty, onyń ishinde jarnamany taratý máseleleri boıynsha Bas prokýratýraǵa qandaı da bir shaǵymdar men aryzdar kelip túsken joq», - dep habarlaıdy Bas prokýratýra.