«Qazposhta» AQ Ekibastuz turǵyndaryna gýmanıtarlyq kómek jóneltýdi qolǵa aldy
«Qazposhta» aksıonerlik qoǵamy Ekibastuz turǵyndaryna gýmanıtarlyq kómek jóneltýdi qolǵa alady. Bul jaıynda kompanıanyń basqarma tóraǵasy Ásel Janasova málim etti, dep habarlaıdy Almaty-akshamy.kz QazAqparatqa silteme jasap.
«Dostar, Ekibastuzda kóp qabatty jáne jeke turǵyn úıler jylýsyz qaldy. Alda 30 gradýstan tómen aıazdy kúnder bar. Bizdiń kompanıa da qaıyrymdylyq isten syrt qala almady: búgin "Qazposhta" gýmanıtarlyq kómek jınaýdy bastaıdy. Astana men Almatydaǵy kez kelgen "Qazposhta" bólimshesine jylytqysh, kórpe, jyly kıim jáne basqa kerek zattar ákelýge bolady. Barlyq kómek Ekibastuzǵa kompanıamyzdyń kúshimen jetkiziledi», - dep jazdy Ásel Janasova Facebook paraqshasynda.
Eske sala keteıik, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.