Elimizde «KIBER TUMAR» aqparattyq-bilim berý naýqany bastaldy.
Jobanyń maqsaty – balalardyń sıfrlyq saýatyn arttyrý jáne kıberkeńistiktegi qaýipti azaıtý, dep habarlaıdy Almaty-akshamy.kz BUU Qazaqstandaǵy balalar qorynyń baspasóz qyzmetine silteme jasap.
«KIBER TUMAR» – Balalardyń quqyǵyn qorǵaý komıteti, IýNISEF Qazaqstan jáne Eýropa Odaǵynyń qoldaýymen iske asqan aqparattyq-bilim berý naýqany. Onyń aıasynda balalar kıberkeńistiktegi túrli qaýip-qaterdiń bazalyq algorıtmderi jáne sarapshylardyń keńesimen tanysyp, paıdaly beınerolıkterdi kóre alady.
Balalardyń quqyǵyn qorǵaý komıtetiniń tóraǵasy Nasymjan Ospanovanyń pikirinshe, búginde ınternet tek aqparat quraly emes, sonymen birge komýnıkasıa quraly.
Sondyqtan mundaı quraldyń múmkindigin barynsha paıdaly, sanaly jáne adamǵa zıany tımeıtindeı etip qoldanýdy jasynan úıretý kerek.
«KIBER TUMAR» – balalardyń qaýipsizdigin qamtamasyz etýge, ata-ana men balanyń onlaın ortada aqparatty tańdaýǵa, kıberkeńistegi «ımýnıtetin» qalyptastyrýǵa múmkindik beretin zamanaýı is-shara», dedi basshy.