Jóndeý jumystary osy aıdyń sońyna deıin jalǵasady.
Kaspıı qubyr konsorsıýmynda jóndeý jumysy qalaı júrip jatyr? Atalǵan saýalǵa elimizdiń Energetıka mınıstri Bolat Aqsholaqov jaýap berdi, dep habarlaıdy Almaty-akshamy.kz QazAqparatqa silteme jasap.
«Kaspıı qubyr konsorsıýmynyń jumysy sońǵy ýaqytta ózekti másele bolyp otyr. Jóndeý jumystary osy aıdyń sońyna deıin jalǵasady. Bizde qajettiniń bári bar, jumys júrip jatyr. Osydan bir jarym apta buryn súńgýir jabdyqtarynyń jetkiliksizdigine baılanysty másele týyndady. Óıtkeni barlyǵy sýdyń astynda. Qajetti jabdyqtar jetkizildi. Jumys jalǵasýda, keshe ǵana áriptesterimmen sol jaıynda sóılestik. Qazan aıynyń sońynda, 25-nen keıin aılaqta ornalasqan shyǵarmaly qurylǵy (ASHQ) qosymsha shiske qosylatyn bolady», - dedi Bolat Aqsholaqov OKQ-de ótken brıfıńide.
Vedomstvo basshysynyń málimdeýinshe, Kaspıı qubyr konsorsıýmy tehnıkalyq turǵydan 20 jyldan beri jumys istep keledi.
«Ýaqyt ótken saıyn jóndeý jumystary júrgizilip keledi. Mehanıkalyq turǵydan alǵanda ár jabdyqtyń qoldaný shegi bar. Aıta ketetini, jóndeý jumystary tolyǵymen júrip jatyr. Soǵan qaramastan konsorsıým jumysy uzaq merzimge toqtaǵan joq. Bizdegi bar aılaqta ornalasqan shyǵarmaly qurylǵy (ASHQ) bıylǵy óndiristi Qazaqstan úshin tolyǵymen eksporttaýǵa múmkindik beredi. Eki qurylǵy bul 100-120% qýat, al úshinshisi únemi rezervte turady. Osyǵan baılanysty biz aldaǵy jyldary Kaspıı qubyr konsorsıýmynyń óndiris josparyna túzetý engizýdi qalamaımyz. Iaǵnı 2023 jyly 92 mln tonnadan astam, al 2025 jylǵa qaraı 100 mln tonna jáne odan kóp ónim alý», - deıdi ol.