Buǵan deıin jas sportshylar aýyldaǵy eski meshitiniń ishinde jattyǵyp kelgen
Almaty oblysy Panfılov aýdany Turpan aýylynda 80 balaǵa arnalǵan sport mektebi ashyldy, dep habarlaıdy Almaty-akshamy.kz.
Sporttyq nysannyń ashylýyna Almaty oblysynyń dene shynyqtyrý jáne sport basqarmasynyń basshysy Nurbaqyt Teńizbaev, Ardaq Nazarov syndy belgili sportshylar qatysty.
Aýyldyń kásipker azamattary salǵan mektepte kúres túrleri men erejesiz jekpe-jek túri boıynsha jattyǵý júrgiziledi. 500 sharshy metr aýmaqty alyp jatqan sporttyq mektepte budan bólek fýtbol jáne balalar oınaıtyn alańdar salynǵan. Sporttyq ǵımaratpen qosa aýyldy kórkeıtýge azamattar 100 mln teńgeden asa qarjy bólgen.
Buǵan deıin jas sportshylar aýyldaǵy eski meshitiniń ishinde jattyǵyp kelgen bolatyn.
«Osyndaı jańa sport zaldy kóp kúttik. Aýylymyzdaǵy aǵalarymyzǵa rahmet. Barlyq jaǵdaıymyzdy jasap berdi. Endi biz barynsha jattyǵyp, aýylymyzdyń, elimizdiń namysyn qorǵaımyz»,- dedi jas sportshy Aıyp Ádiljan.
Sonymen qatar el Táýelsizdiginiń 30 jyldyǵy qarsańynda osy azamattar aýyl janyna 30 metrlik úlken Tý tuǵyr ornatty. Igi iske bastama bolǵan kásipker Jalǵas Altynbek bunyń barlyǵy el Táýelsizdiginiń 30 jyldyq mereıtoıyna tartý deıdi.
«Aýylymyzǵa sport mektebin salý kópten oıda júr edi. Óıtkeni ini, baýyrlarymyz eski ǵımaratta jattyqty. Búgin mine mektepti paıdalanýǵa berdik. Qoldaǵan barsha jigit, aýyl turǵyndaryna alǵysymdy bildiremin. Buǵan qosa Tý tuǵyr ornattyq. Áli de aýylǵa budan ary qoldaý kórsete beremiz»,- dedi kásipker.
Qazirgi sátte sport mektebin qujattandyrý júrgizilip jatyr. Aldaǵy ýaqytta jattyqtyrýshylarǵa arnaıy shtat bólinetin bolady. Sondaı-aq, atalǵan kúres mektebine kórshi aýyldyń balalary da kelip jattyǵýyna múmkindik qarastyrylǵan.