Júregi toqtap qalǵan kólik júrgizýshisi avtobýsqa soǵylyp tiri qaldy

Júregi toqtap qalǵan kólik júrgizýshisi avtobýsqa soǵylyp tiri qaldy Cýret: Almaty-akshamy.kz

Qatty soqqydan júregine massaj jasalǵan


Maýsymnyń 3-i kúni tańerteń Almatyda Jumabaev pen Seıfýllın kósheleriniń qıylysynda jol-kólik oqıǵasy oryn alǵan: jeńil kólik marshrýttyq avtobýsqa soǵyldy. Jeńil kólik júrgizýshisi Dmıtrıı kólik júrgizip kele jatyp esin joǵaltqan. Qudaıǵa shúkir, apattan zardap shekkender joq, dep habarlaıdy Almaty-akshamy.kz.


Dárigerlerdiń aıtýynsha, er adam júrek talmasyna ushyrap, avtobýs soqqysy Dmıtrııdiń ómirin saqtap qaldy: ol keýdesimen rúlge qatty soǵylyp, júrekke mehanıkalyq massaj jasalǵan eken.



«Sol kúni ózimdi nashar sezinip, terlep oıandym, búkil boıymda álsizdik boldy, biraq men buǵan mán bermedim. Eki stakan qoıý kofe ishtim, sodan keıin qustym, buǵan da asa mán bermedim. Mashınaǵa otyryp, júrip kettim. Esimnen tanyp qaldym, sóıtip jan saqtaý bóliminde biraq oıandym. Esimde túk joq. Avtobýsqa soǵylǵanymdy, meni qutqarǵandaryn maǵan aıtyp berdi. Sodan bildim. Soqqy júrekke mehanıkalyq massaj jasap, júrek qaıta júrgen eken. Men avtobýsqa kirip ketip, artqy tereze syndyrǵan ekenmin. Avtobýs júrgizýshisi jedel járdem shaqyryp, meni kóligimnen shyǵaryp, sý shashyp, alǵashqy medısınalyq kómek kórsetti. Men avtobýs júrgizýshisin taýyp, oǵan kórsetken kómegi úshin alǵys bildirgim keledi. Tórtinshi qalalyq aýrýhanada júrek tamyrlaryna ota jasaldy, trombty alyp tastady, qazir ózimdi aıtarlyqtaı jaqsy sezinemin, buryn qysymym 100/90 bolsa, qazir 110/80 boldy», - deıdi Almaty qalasynyń turǵyny Dmıtrıı Sınákın.



- Bolǵan oqıǵa – biregeı, - deıdi №4 qalalyq klınıkalyq aýrýhananyń rentgen-endovaskýlárlyq hırýrgıa jáne kardıologıa bólimshesiniń meńgerýshisi Asqar Narynbaev. Onyń bólimshesi júrek pen mıdyń ómirlik mańyzdy tamyrlaryndaǵy qan aınalymyn qalpyna keltirý boıynsha mańyzdy hırýrgıalyq otalardy jasaıdy.




«Naýqas bizge shuǵyl túrde kardıogendi shok jáne tómen qan qysymy klınıkasymen óte aýyr jaǵdaıda tústi. Naýqasty qabyldaý bólimine kirgizbeı, birden rentgen-endovaskýlárlyq hırýrgıanyń ota jasaý bólimine jetkizdi. «Oń jaq koronarlyq arterıanyń jedel trombozyn» anyqtadyq. Arterıa trombozdyq massalarmen jabyldy, biz angıoplastıka, tromb aspırasıasyn jasap, qan aǵymyn qalpyna keltirdik, sodan keıin stent qoıdyq. Naýqasta koronarlyq qan aǵymy tolyq qalpyna keldi. Bul jaıt koronarlyq arterıalardyń jedel trombozy kezinde ómirge qaýip tóndiretin arıtmıanyń paıda bolýymen, ol elektrlik kardıoversıa nemese elektrlik kardıodefıbrıllásıa arqyly qalpyna keltiriletinimen qyzyq. Bul jerde avtobýspen jeńil kólik soqtyǵysyp, er adam keýde tusynan soqqy alǵan. Ári bul soqqy júrek yrǵaǵynyń qalpyna kelýine áser etken - bul mehanıkalyq kardıoversıa dep atalady. Bul baqytqa bastaıtyn baqytsyzdyq boldy ǵoı», - dep túsindirdi №4 qalalyq klınıkalyq aýrýhananyń bólimshe meńgerýshisi Asqar Narynbaev.



Dárigerler mańyzdy nárseni este saqtaýdy usynady: eger klınıkalyq belgiler paıda bolsa, dereý dárigermen keńesip, asqynýlardyń aldyn alǵan durys.



«Jedel mıokard ınfarktisi bar naýqas emhanaǵa neǵurlym tezirek jetkizilse, dárigerdiń koronarlyq qan aǵymyn qalpyna keltirý jáne nekroz aımaǵyn azaıtý úshin jyldam manıpýlásıa jasaý múmkindigi soǵurlym joǵary bolady, bul onyń odan ári ómir súrý sapasyna áser etedi», – dep qorytyndylady dáriger.



Dmıtrıı Sınákınniń oqıǵasy baqytty aıaqtaldy. Almatylyq azamat satpaqshy bolǵan kólik ıesinde qaldy. Iesiniń ómirin saqtap qalǵan kólik Sınákınder otbasynyń boıtumaryna aınalmaqshy.


Sizdiń reaksıańyz?
Unaıdy
0
Unamaıdy
0
Kúlkili
0
Shekten shyqqan
0
Sońǵy jańalyqtar

23:21

21:42

17:30

16:36

16:26

16:05

15:55

14:58

14:45

14:33

14:15

13:33

13:17

12:59

12:24

12:10

11:52

11:23

11:07

11:01

10:45

10:33

10:15

09:43

09:35