2025 jyly toǵyz aı ishinde Almatynyń jergilikti búdjet kirisi 1,6 trln teńgege jetti. Bul ótken jyldyń osy kezeńimen salystyrǵanda 20% joǵary. Jyl qorytyndysy boıynsha qala búdjetine túsetin jalpy túsim kólemi 2,3 trln teńgeden asýy múmkin. Bul qala tarıhyndaǵy rekordtyq kórsetkish.
Búdjet kiristeriniń artýy Almatynyń turaqty damyp kele jatqanyn kórsetedi. Qalada aýqymdy ekonomıkalyq jáne áleýmettik bastamalar júzege asyrylyp keledi. 35 jyl ishinde Almaty jasampazdyq pen damýdyń sımvolyna aınalyp, onyń jetistigi búkil eldiń maqtanyshyna aınaldy.
Shaharda kásipkerlik pen ınovasıany qoldaıtyn jańa bıznes-alańdar men tehnoparkter qurylyp jatyr. Áleýmettik turǵydan az qamtylǵan otbasylardy, zeınetkerlerdi jáne múmkindigi shekteýli azamattardy qoldaý sharalary kúsheıtilip otyr.
Turǵyn úı-kommýnaldyq sharýashylyǵyna, kólik ınfraqurylymyna jáne densaýlyq saqtaý salasyna «aqyldy» tehnologıa engizilip, qalany basqarýdyń tıimdiligi men turǵyndardyń ómir súrý sapasy artyp otyr.
Almaty kún saıyn jańaryp, ekonomıkalyq ósim, ınovasıa jáne adamǵa degen qamqorlyqty úılestire otyryp, bolashaqtyń zamanaýı, turaqty jáne jaıly qalasyna aınalyp keledi.