Poıyzdar men ushaqtar jáne avtobýstar qalypty deńgeıde jolaýshylar tasymalyn qamtamasyz etýde
Bul týraly Indýstrıa jáne ınfraqurylymdyq damý mınıstrligi málimdedi, dep habarlaıdy Almaty-akshamy.kz.
«Sońǵy kúnderi Reseı azamattarynyń kórshiles memleketterge jappaı kóshýi qoǵam arasynda úlken rezonans týdyrýda. Áleýmettik jelilerde shekaralyq ótkizý beketterindegi qalyń nópir men uzyn-sonar kezek jaıyndaǵy túrli aqparattar taralýda. Atalǵan jazbalardaǵy pikirlerge qaraǵanda bul másele otandastarymyzdyń erekshe nazaryn aýdaryp otyr. Óz tájirıbemnen biletindeı, erte me, kesh pe – buqaralyq aqparat quraldary ókilderi tarapynan Indýstrıa jáne ınfraqurylymdyq damý mınıstrligine osy másele týrasynda kóptegen jýrnalısik saýaldar túsýi múmkin. Sebebi, bizdiń vedomstvo avtomobıl, temir jol jáne áýe kóligi arqyly jolaýshylar tasymalyna jaýapty», - delingen habarlamada.
Mınıstrliktiń málimetinshe, búginde elimizdiń barlyq kólik ınfraqurylymy shtattyq rejımde jumys istep jatyr. Poıyzdar men ushaqtar jáne avtobýstar qalypty deńgeıde jolaýshylar tasymalyn qamtamasyz etýde.
«Respýblıkalyq mańyzy bar kólik joldaryndaǵy qazirgi jaǵdaı men ondaǵy qozǵalys qarqyndylyǵy da aldyńǵy aptalardaǵydaı qalypty deńgeıde. Sondaı-aq J. Omarhan tasymaldaý syıymdylyǵyn arttyrý jáne reısterdiń keshigý sanyn azaıtý maqsatyndaǵy tapsyrmany oryndaý sheńberinde otandyq áýe parki taǵy bir «Boeing-737» ushaǵymen tolyqqany týraly da habarlady. Bul SCAT avıakompanıasynyń sońǵy bir jarym aıda alǵan tórtinshi «Boeing» áýe kemesi. Syıymdylyǵy 189 oryndyqty quraıtyn áýe kemesi avıakompanıa parkindegi ushaqtar sanyn 30-ǵa deıin arttyrdy. Bıylǵy jyldyń sońyna deıin Qazaqstannyń azamattyq avıasıa floty taǵy da 10 áýe bortymen tolyǵady dep josparlanyp otyr», - delingen habarlamada.