Almaty qalasy «JITS aldyn alý jáne oǵan qarsy kúres ortalyǵy» keńes berý jáne profılaktıkalyq kómek kórsetý úshin kólikpen qamtamasyz etildi
28 qarasha Almaty qalasy JITS-tiń aldyn alý jáne oǵan qarsy kúres ortalyǵynda (Basenov kóshesi, 2, 4 korpýs) Dúnıejúzilik JITS-pen kúres kúnine arnalǵan naýqan aıasynda IýNEIDS «Kóshbasshylyq – qoǵamdastyqtarǵa» uranymen jyljymaly pýnktke arnalǵan jabdyqtalǵan kólikti tapsyrý rásimi ótti, dep habarlaıdy almaty-akshamy.kz.
Jyljymaly pýnkt – bul HYUNDAI H350 bazasynda Almatydaǵy «Hyundai Com Trans Kazakhstan» JSHS zaýytynda jasalǵan arnaıy avtokólik. Ol halyqtyń negizgi toptaryna, sondaı-aq AITV-men aýyratyn, onyń ishinde túzeý mekemelerindegi adamdarǵa qyzmet kórsetý jáne testileý jabdyqtarymen jabdyqtalǵan. Jyljymaly pýnkttiń kómegimen dárigerler ÚEU qyzmetkerlerimen birlesip naýqastarǵa dári-dármekterdi jedel jetkizip, emdelýge monıtorıń júrgizý úshin qajetti konsýltasıalar, tekserýler júrgize alady.
HNT ókilderi ózderiniń jerlerine jaqynyraq ornalasqan profılaktıkalyq baǵdarlamalarǵa (býkletter, qorǵanys quraldary jáne AITV-ǵa testileýden ótý múmkindigi) qol jetkize alady. Kún saıyn jyljymaly brıgadalar HNT ókilderimen aldyn ala kelisilgen marshrýt boıynsha shyǵady. Árbir kelýshige qupıalylyq pen anonımdilikke kepildik beriledi.
Jyljymaly pýnkt JITS-tyń aldyn alý jáne oǵan qarsy kúres ortalyǵynyń mamandaryna qoǵamdyq uıymdarmen birlesip HNT, AITV-men aýyratyn adamdardy jáne olardyń seriktesterin profılaktıkalyq baǵdarlamalarmen jáne medısınalyq qyzmettermen qamtýdy ulǵaıtýǵa múmkindik beredi. Bul halyqtyń negizgi toptary arasynda jıi tirkeletin AITV-nyń jańa jaǵdaılaryn azaıtý úshin óte mańyzdy, - dep atap ótti Almaty qalasy JITS ortalyǵynyń bas dárigeri Marat Túkeev.
Jyljymaly pýnktti satyp alýdy «AITV epıdedemıasyn baqylaýdyń Almaty modeli» jobasymen júzege asyrdy. Jobanyń maqsaty Almatyda AITV epıdemıasyn baqylaý boıynsha turaqty, keshendi, ekonomıkalyq tıimdi qalalyq baǵdarlamany qurý jáne ony iske asyrý bolyp tabylady. Úsh jyl ishinde joba AITV-ınfeksıasynyń aldyn alý, testileý men emdeýde ınovasıalyq tásilderdi engizýde. Jobanyń qyzmetterin HNT-nyń 17 myńnan astam ókili aldy, 11 myńnan astamy AITV-ǵa tekserildi, onyń ishinde 8 myńnan astamy ÚEU bazasynda synaldy. AITV-ınfeksıasynyń 142 jańa jaǵdaıy anyqtaldy, onyń 95%-y emdeýdi bastady.
Memlekettik jáne úkimettik emes uıymdardyń tyǵyz ózara is-qımylynyń arqasynda joba aıaqtalǵannan keıin JITS ortalyǵy men ÚEU mamandarynyń mobıldi kópsalaly toby AITV-men aýyratyn adamdarǵa jáne halyqtyń negizgi toptaryna qyzmetter keshenin kórsetýdi jalǵastyrady, - dedi Eýrazıa elderindegi ICAP óńirlik dırektory Anna Derábına.
«Kóshbasshylyq – qaýymdastyqtarǵa» IýNEIDS uranymen Dúnıejúzilik JITS-pen kúres kúnine arnalǵan naýqan Qazaqstanda 20 qarashadan 1 jeltoqsanǵa deıin ÚEU-ǵa jáne AITV-ny eńserýdegi qaýymdastyqqa nazar aýdarý maqsatynda ótkiziledi. Qaýymdastyqtar qoǵamdyq densaýlyq saqtaý qyzmetine qatysty adamdardy baılanystyrady, senimdilikti arttyrady, jańashyldyq jasaıdy.