Jergilikti fermerlerdiń ál-aýqaty osy jerdegi sýǵa baılanysty.
Almaty oblysynda kóp jyldan beri aýyl sharýashylyǵymen shuǵyldanyp kele jatqan fermelrer ústimizdegi jyly sý tapshylyǵyn kórmedik degendi aıtyp otyr, dep habarlaıdy Almaty-akshamy.kz.
Qazaqstannyń Ekologıa mınıstrligi «Qyrmysqan» sharýa qojalyǵyn mysalǵa keltirip otyr. Bul sharýashylyq sýarmaly sýdy D.Qonaev atyndaǵy Úlken Almaty kanalynan alady.
Asan Ablaevtyń aýdany 600 gektardy quraıtyn sharýashylyǵy Almaty oblysy Eńbekshiqazaq aýdany Bıjanov aýylynda ornalasqan. Fermer 20 jyldan beri aýyl sharýashylyǵymen aınalysyp keledi. Soıa, bıdaı, suly, júgeri, jońyshqa ósirip, elimizdiń agroónerkásibi salasyna súbeli úles qosýda. Sondaı-aq, mal sharýashylyǵymen de aınalysady. Sıyr sútin Qazaqstannyń iri sút óńdeý zaýyttarynyń birine jetkizedi.
«Úlken Almaty kanalynyń basshylyǵy jergilikti sharýa qojalyǵy ıelerimen kezdesip, kóterilgen barlyq ózekti máselelerdi talqylap, olardy sheshýge basymdyq berýde. Kemshilikter jumys barysynda túzetilip jatyr. Bizge jaqsy sýarýdy qamtamasyz etý úshin usynystar beriledi, mysaly, egistikti birneshe uıashyqtarǵa bólse, sýarý tıimdirek bolatyny aıtyldy», – dedi Asan Ablaev.
Sýdy únemdeıtin tehnologıalardy, mysaly, jańbyrlatatyn qondyrǵyny ornatýǵa keler bolsaq, fermerdiń aıtýynsha, onyń mundaı úlken salymdar úshin áli qarjylyq múmkindikteri joq, sondyqtan búginde bul máselede tek memleketten úmit kútedi.
«Tamshylatyp sýarýǵa keletin bolsaq, ol barlyq jerde qolaıly emes. Mysaly, jońyshqa úzdiksiz sýarýdy qajet etedi», - deıdi Asan Ablaev.
Fermerdiń aıtýynsha, egistik alqaby taýly-tasty. Sol sebepten sýarmaly sý kóp mólsherde qajet. "Búgin sýarǵannan keıin bir apta sýarmasań, bári keýip qalady: 40 sm topyraqtyń asty tas. Osy sebepti biz jıi sýarýymyz kerek. Alaıda qarajat máselesi qymbatqa shyǵady».
Asan Ablaevtyń sharýa qojalyǵynda 25 adam jumys isteıdi. Aýdanda da iri fermerleri bar. Olardyń ál-aýqaty osy jerdegi sýǵa baılanysty.