«Jeltoqsan-Almaty» qoǵamdyq birlestiginiń músheleri saıası qýǵyn-súrgin jáne asharshylyq qurbandaryn eske alyp, duǵa-tilek baǵyshtap, qurmet kórsetti. Ult ustazy atanǵan Ahmet Baıtursynulynyń eskertkishine jáne megapolıske irgeles jatqan Talǵardaǵy (Almaty oblysy) Batyrlar aleıasyna gúl sebetterin qoıyp, bir mınýt únsizdikpen taǵzym etti.
Ótken ǵasyrǵa kóz júgirter bolsaq, qazaq halqy sekildi asharshylyq, qýǵyn-súrgin, túrli qasiretterdi ótkergen ult neken-saıaq. Tarıhshylardyń aıtýynsha, 100 myńnan astam adam qýǵyn-súrginge ushyrap, 25 myńy atylǵan. Mıllıondaǵan adam ashtyqtan qynadaı qyrylǵan.
«Jeltoqsan-Almaty» ókilderi meıramhanada sol jandardyń rýhyna baǵyshtap as berip, Quran oqytty.
– Ult úshin ómirin qurban etken arystarymyzdyń esimin ulyqtaý, solaqaı saıasattyń saldarynan opat bolǵan tulǵalardyń sońynan duǵa baǵyshtaý — barshamyzdyń azamattyq hám perzenttik boryshymyz. Bul is-shara tek as berý emes, ol – ult jadyn jańǵyrtý, azattyq úshin kúreskenderdiń rýhyna bas ıý, tarıhtan taǵylym alý. Mıllıondardyń kóz jasy, ashtyqtan qynadaı qyrylǵandardyń arýaǵy, «halyq jaýy» atanyp, jazyqsyz atylǵan arystardyń azaly rýhy – bári osy bir kúnde únsiz «sóıleıdi». Al búgin jeltoqsandyqtar sol únsizdikke ún qosyp, erlik pen eldiktiń shynaıy kórinisin taǵy bir kórsetip otyr, – deıdi «Jeltoqsan-Almaty» qoǵamdyq birlestiginiń tóraǵasy Serikbek Jandybaev.
Quramynda 200-den astam múshesi bar «Jeltoqsan-Almaty» qoǵamdyq birlestigi bul aıtýly kúndi jylda atap ótýdi dástúrge aınaldyrǵan. Sebebi olar bul kúnniń qadir-qasıetin jaqsy biledi.
– Saıası qýǵyn-súrgin jáne asharshylyq qurbandaryn eske alý kúni – elimizdiń júregine jazylǵan jaranyń jańǵyryp, taǵzym men táýbeniń toǵysatyn sáti. Al 1986 jylǵy Jeltoqsan oqıǵasy – qazaq jastarynyń ádiletsizdikke qarsy shyqqan shynaıy erlik sáti. Olar keńestik totalıtarlyq júıege qarsy turyp, ulttyq namys pen egemendikke degen umtylysty álemge pash etti. Jeltoqsan oqıǵasy – Qazaqstan táýelsizdiginiń bastaýy, al jeltoqsanshylar – sol joldaǵy alǵashqy qurbandar men qaharmandar. Sondyqtan olardyń búgingi taǵzym sharasyna qatysýy – úlken mánge ıe, – deıdi «Jeltoqsan-Almaty» qoǵamdyq birlestigi tóraǵasynyń orynbasary Tórehan Qydyralıev.
Qurmet, taǵzym is-sharasy barysynda «Jeltoqsan-Almaty» qoǵamdyq birlestiginiń tóraǵasy Serikbek Jandybaev Jeltoqsan oqıǵasy kezinde alańda azattyq kúresiniń otyn tutatyp, alaýdaı jaqqan qazaq qyzdarynyń keýdesine «Táýelsizdikke qosqan úlesi úshin» tósbelgisin taqty. Bul jolǵy marapat ıeleri – Aınash Hamıtova men Raıa Bımýrzaeva. Al Qanshaı Stambekova qoǵamdyq birlestiktiń «Asyl ana» tósbelgisimen marapattaldy.
İs-sharada jeltoqsandyqtar ótkenniń úni ǵana emes, búgingi beıbit kúnniń de shyraqshylary degen lebiz aıtyldy.
– Jeltoqsandyqtar – zulmat jyldardyń, otarlyq ezginiń, alańdaǵy azattyq úshin kúrestiń tiri kýágerleri. Olar da umyt bolmaýǵa tıis tarıh. Asharshylyq pen qýǵyn-súrgin – qazaq halqynyń qaıǵysy, al Jeltoqsan – onyń rýhanı jańǵyrýynyń sımvoly. Osyndaı tarıhı sabaqtastyq arqyly biz táýelsizdigimizdiń qadirin tereńirek uǵyna alamyz. «Jeltoqsan-Almaty» qoǵamdyq birlestiginiń bul is-sharasy – keshegi ótkenderge taǵzym ǵana emes, ótkendi búgingi urpaqqa amanat etip jetkizý jolyndaǵy qyzmeti, – deıdi «Jeltoqsan-Almaty» qoǵamdyq birlestiginiń Talǵar aýdany boıynsha jetekshisi Sátjan Bólekbaev.
