Aýrýdy erte anyqtaý tolyq qalpyna kelý múmkindigin aıtarlyqtaı arttyrady. Bul týraly Óńirlik komýnıkasıalar qyzmetiniń alańynda Almaty onkologıalyq ortalyǵynyń sarapshylary habarlady.
«Adam papılloma vırýsy jatyr moıny obyrynyń qaýip faktorlaryna jatady. Sondyqtan jatyr moıny obyrynyń aldyn alý jáne erte dıagnostıkasy erekshe mańyzdy. Jatyr moıny obyrynyń aldyn alýdyń negizgi ádisi APV-ǵa qarsy vaksınasıa bolyp tabylady», - dep atap ótti Almaty Onkologıalyq ortalyǵy dırektorynyń orynbasary Alıa Týresheva.
Sarapshy jatyr moıny obyryn erte anyqtaý maqsatynda respýblıkada 30 jastan 70 jasqa deıingi áıelderdi 4 jylda 1 ret kezeńdilikpen skrınıngtik tekserýler júrgiziletinin atap ótti.
Máselen, 2023 jyldyń qorytyndysy boıynsha Almaty qalasynda jatyr moıny obyrynyń 223 jaǵdaıy anyqtaldy (esepke alynǵan barlyq onkologıalyq naýqastardyń 4,1%), onyń ishinde erte satysynda – 142. Barlyǵy JMO bar 2522 áıel esepte tur.
«Skrınıngtik tekserýler kezinde 38 jaǵdaı anyqtaldy, barlyǵy 0-1 kezeńde. Osy kezeńderdegi mamandandyrylǵan emdeý tolyq qalpyna keltirýge múmkindik beredi. Qazaqstan Respýblıkasy halqynyń onkologıalyq aýrýlaryna qarsy kúres jónindegi 2023-2027 jyldarǵa arnalǵan keshendi jospar sheńberinde 11 jastaǵy qyzdardy APV-ǵa qarsy vaksınasıalaý júrgiziletin bolady», - dep bólisti ol.
Jýrnalıserdiń suraqtaryna jaýap bere otyryp, A. Týresheva eresek jasta vaksınasıa da tıimdi bolýy múmkin ekenin atap ótti: ol adamdy áli ushyraspaǵan APV túrlerinen qorǵaı alady.
«Dúnıejúzilik densaýlyq saqtaý uıymy 26 jasqa deıingi adamdarǵa vaksınasıalaýdy usynady. Keıbir jaǵdaılarda dáriger AQSH-taǵy sıaqty ekpeni 46 jasqa deıin alýǵa keńes bere alady. Biraq aldymen sizdiń deneńizde vırýs bar-joǵyn tekserip, teris nátıje bolǵan jaǵdaıda vaksınasıalaý kerek. Siz bul ınfeksıanyń tasymaldaýshysy emes ekenińizge jáne aýyrmaıtynyńyzǵa senimdi bolýyńyz kerek», - dedi spıker.
Brıfıńke qatysqan Almaty onkologıalyq ortalyǵynyń onkogınekologıa bólimshesiniń meńgerýshisi Raıhan Bolatbekova da vaksınasıalaýdyń mańyzdylyǵyn atap ótti.
«Vaksınanyń áser etý uzaqtyǵy ımmýnogendilik dep atalady. Kóptegen zertteýlerge sáıkes ımmýnogendilik vaksınasıadan keıin 8 jyldan 10 jylǵa deıin saqtalady. Sol zertteýshilerdiń aıtýynsha, aýqymdy ımmýndaýdan keıin revaksınasıa qajet emes ekenin bilemiz», - dep qorytyndylady ol.