Erterekte adamdar aspandaǵy qalyqtaǵan qustarǵa qarap ushýdy armandady. Ǵylym-bilimniń qarqyndy damýymen adamzat ushaq qurastyryp, aspandy baǵyndyrdy, bul armanyn oryndady. Odan keıin aradaǵy alys qashyqtyqqa qaramaı hat almasyp, bir-birin kórýdi arman etti. Tehnologıalyq jetistikter men ǵalamtordyń arqasynda adamdar álemniń eki shetinde otyryp vıdeo, aýdıo, jazba baılanysta otyra alatyn múmkindikke ıe boldy, bul armanyna da qol jetkizdi. Al HHİ ǵasyrdyń basynan bastap adamdar ózderiniń ómirlerin jeńildetip, barlyǵyn ózi isteı alatyn robottar men jasandy ıntellekt týraly oılaı bastady. Endi mine, adamzattyń kezekti armany bizdiń kózimizshe oryndalyp, kúndelikti ómirdiń bir bólshegine aınalyp bara jatyr.
Jalpy jasandy ıntellektiniń fenomeni kópshilikke sońǵy 2 jylda aıqyn belgili bola bastaǵanymen, bul ǵylymı jetistik kóp jyldardan beri ómirimizge enip keledi. Osydan 26 jyl buryn IBM korporasıasy qurastyrǵan Deep Blue kompúteri sol kezdegi shahmattan álem chempıony Garrı Kasparovty eki ret jeńip, jasandy ıntellektiniń kúshin kórsetken.
Al qazir adamzatqa JI-diń (jasandy ıntellekt) shynaıy kúshin alǵashqy bolyp pash etken jobalardyń biri – ChatGPT boldy. Suraǵanyńa qaraı stýdent bolyp dıplom jazyp ne tájirıbeli kásipker qusap bıznes-joba qurastyratyn, deregin berseń kópshilik aldyndaǵy sózińe deıin jazyp beretin bul JI týraly búginde halyq habardar. Degenmen, odan bólek áldekimderge jańa múmkindik berip, áldekimderdiń kásibin almastyrýǵa kúshi jetetin ózge neırojeliler joq emes. Olardyń qatarynda HeyGen Labs jasandy ıntellektisin atap ótý qajet. Bul JI sońǵy aılarda álemdik tanymaldylyqqa ıe boldy. Heygen Labs kómegimen beınejazbadaǵy aýdıo tilin basqa tilderge avtomatty túrde aýdarýǵa bolady. Mundaı tehnologıa buǵan deıin de bolǵany belgili. Biraq bul neırondyq jeliniń ereksheligi – ol beınejazbadaǵy adamnyń daýys tembrin tolyqtaı saqtaıdy. Sondaı-aq, ózge tildegi sózderge qaraı spıkerdiń erinderin beıimdeıdi. Iaǵnı aıtylǵan JI arqyly kez kelgen adamdy daýsyn ózgertpeı, álemniń bar tilinde sóıletýge bolady jáne ol úshin eshqandaı kúsh salýdyń qajeti joq. Bárin neırojeli istep beredi.
Inovasıalyq jańalyqtardyń jeli qaıda soǵatynyn aldyn ala boljap, bilip otyratyn Google kompanıasy da óz jasandy ıntellektisin damytyp keledi. Google asıstent atalǵan neırojeli áıgili Apple kompanıasynyń Siri men Iandekstiń «Alısasyna» uqsas. Dese de, kompanıanyń bas dırektory Sýndar Pıchaı jańalyqtar kórsetiletin prezentasıalardyń birinde Google asıstenttiń ózge básekelesterinen naqty aıyrmashylyǵyn kórsetti. Aıtylǵan neırojeli qoldanýshy tarapynan berilgen aldyn ala tapsyrmaǵa qaraı ártúrli mekemelerge qońyraý shalyp, sol adamnyń atynan sóılese alady. Mysaly, Google prezentasıasynda neırojeli shashtarazǵa tikeleı qońyraý shalyp, naqty bir adamdy óz shashtarazyna aldyn ala jazyp qoıdy. Aıta ketken jón, áńgime barysynda Google asıstent tek jattandy sóz aıtýmen shektelgen joq. Kerisinshe, tirkeý bólimindegi adamnyń suraqtaryna esti jaýap berip, neırojelini qoldanýshy adamǵa yńǵaıly ýaqytty tańdaı aldy. JI-diń bul qyzmeti ChatGPT men Heygen Labs syndy dál qazir qoljetimdi bolmaǵanymen, jaqyn ýaqytta qoldanysqa berilýi múmkin.
El aýzynda júrgen jasandy ıntellektilerdiń qatarynda Midjourney men Musicfy bar. JI-diń birinshisi, jazylǵan mátinge qaraı sýret jasaıtyn bolsa, ekinshi neırojeli adamǵa mýzyka jazýda kómektesedi. Iaǵnı Musicfy qoldanýshynyń vokalyn paıdalana otyryp, ózdiginen án jaza alady nemese neırojelige júktelgen daýys yrǵaǵyn óńdep, daıyn mýzyka shyǵaryp beredi. Al Midjourney mátindegi árbir naqty suranysqa qaraı túrmedegi AQSH prezıdentiniń sýretinen bastap, suraǵan adamnyń fantazıasyna qaraı kez kelgen sýret daıyndap berýge ázir. Biraq alǵashynda tegin bolǵan bul JI-lerdi qoldaný qazirgi ýaqytta aqyly. Osyǵan qaraı aldaǵy jyldary jasandy ıntellekt iri aqsha men bıznes kózine aınalady degen boljam jasaı alamyz.
Aıtylǵan neırojeliler uıaly telefondaǵy qosymsha ne kompúterdegi baǵdarlama retinde bolsa, temirge jan bitiretin robottardyń ishinde ornatylǵan jasandy ıntellektiler de qarqyndy damyp keledi. Onyń jarqyn mysalyn ızraıldik Travel kompanıasy kórsetti. Izraıldik kompanıa Chılıdegi Unifrutti kompanıasymen birge jasandy ıntellektisi bar robot-platforma arqyly alma jınady. Ushatyn drondar qozǵalmaly platformaǵa sym arqyly baılanysqan, al bul qurylymnyń barlyǵyn JI basqarady. Drondar jemis aǵashtarynyń arasynan ushyp, tek pisken almalardy adamnyń kómeginsiz jınap shyqty. Joba ázirleýshileri jasandy ıntellektisi bar robottardy fermerliktiń bolashaǵy sanaıdy.
Túıin:
Bıyl 28 naýryz kúni Future of life uıymynyń saıtynda Tesla, SpaceX jáne Twitter basshysy Ilon Mask, Apple kompanıasynyń negizin qalaýshylardyń biri Stıv Voznák jáne Pinterest negizin qalaýshylardyń biri Evan Sharp JI jasaýshylarǵa ashyq hat joldady. Sondaı-aq, qujatqa jasandy ıntellekt salasynda jumys isteıtin 1 myńnan astam sarapshy qol qoıdy. Ashyq hatta qýatty neırojelilerdi damytýdy kem degende alty aıǵa toqtatý qajettiligi týraly aıtylǵan.
«Biz jasandy ıntellektti zertteıtin barlyq zerthanalardy GPT-4-ten qýattyraq barlyq júıelerdi damytýdy kem degende alty aıǵa dereý toqtatýǵa shaqyramyz. Bul shynaıy oryndalýy kerek», – dep atap ótti hat avtorlary.
Iá, «adamzatty Marsqa jiberemin» deıtin Ilon Mask syndy álemdegi eń ozyq kompanıa basshylarynyń bulaı dabyl qaǵýy bostan bos bolmas. Amerıkalyq Goldman Sachs bankiniń dereginshe, neırojelilerdi engizýge baılanysty búkil álem boıynsha 300 mıllıonǵa jýyq adam jumyssyz qalýy múmkin. Bul onsyz da kúıbeleń kúıde turǵan jer sharyn odan ári tozdyrary anyq. Degenmen, ata-babamyz «jaqsy sóz jarym yrys» demekshi, neırojeliler adamzatqa ıgilik alyp keler dep senemiz.