Parlament palatalarynyń birlesken otyrysynda Prezıdent Qasym-Jomart Toqaev Úkimetke IT qyzmetterdiń eksportyn bir mıllıard dollarǵa jetkizýdi tapsyrdy.
«Ózderińiz bilesizder, men sıfrlandyrý men ınovasıalardy engizý máselesine kóp kóńil bólemin. Bizdiń aldymyzda Qazaqstandy IT elge aınaldyrý deıtin mańyzdy strategıalyq mindet tur. Sıfrlandyrý salasynda jetistikterimiz bar. Elektrondy úkimet pen fıntehti damytý ındeksi boıynsha álemde kóshbasshylar qataryndamyz», - dedi Memleket basshysy.
Qasym-Jomart Toqaev eldegi IT salanyń eksport kólemi ótken jyly ǵana bes ese óskenin atap ótti.
«Jyl sońyna deıin bul kórsetkish 500 mıllıon dollarǵa jetýi múmkin. Biraq munymen shektelmeýimiz kerek. Úkimettiń aldyndaǵy jańa mindet – 2026 jylǵa qaraı IT qyzmetterdiń eksportyn bir mıllıard dollarǵa jetkizý. Buǵan iri sheteldik IT kompanıalarmen birlesken kásiporyndar ashý járdemdesedi. Úkimet bul másele boıynsha egjeı-tegjeıli usynystar engizýi kerek», - dedi Prezıdent.