Elimizdiń sý sharýashylyǵyn basqarý júıesine túgel reforma jasalady. Bul týraly Parlament palatalarynyń birlesken otyrysynda Qazaqstan halqyna Joldaýyn jarıalaǵan Memleket basshysy Qasym-Jomart Toqaev aıtty, dep habarlaıdy Almaty-akshamy.kz.
Prezıdenttiń atap ótýinshe, Sý resýrstary jáne ırrıgasıa mınıstrliginiń aıasynda Ulttyq gıdrogeologıa qyzmeti qaıta jumys isteıtin bolady. Sondaı-aq elimizdiń sý sharýashylyǵyn basqarý júıesine túgel reforma jasalady. «Qazsýshar», «Nura toptyq sý qubyry» jáne basqa da negizgi kompanıalarda ózgeris bolady.
«Jalpy, osy salanyń materıaldyq jaǵdaıyn jaqsartyp, kadr máselesin sheshý kerek. Sý tapshylyǵynyń artýy – Ortalyq Azıa memleketterine ortaq másele. Sýdy únemdep paıdalaný energetıka nemese kólik salasy sıaqty aımaqtaǵy yntymaqtastyqtyń taǵy bir jańa baǵytyna aınalmaq. Úkimetke kórshi eldermen birlesip, bul máseleni jan-jaqty pysyqtaýdy tapsyramyn», - dedi Qasym-Jomart Toqaev.
Sondaı-aq, Prezıdent Qasym-Jomart Toqaev sý únemdeý boıynsha birqatar bastama kóterdi.
«Egin sharýashylyǵynda mańyzdy reforma jasaıtyn kez keldi. Egis túrlerin kóbeıtýimiz kerek. Sondaı-aq kóbirek paıda ákeletin daqyldar ekken jón. Sýdy kóp qajet etetin egis alqabyn birtindep azaıtyp, bir ǵana daqyl túrin egýdi shekteý qajet. Dıqandardy jergilikti tuqymmen qamtamasyz etý mańyzdy. Sonymen qatar jańa suryptardy shyǵaryp, ony ósirý máselesin sheshken jón», - dedi Memleket basshysy.