Būl materıaldyń maqsaty – «ıt asyrau jeńíl me, bala baǵu qıyn ba?» degen saualdyń jauabyn tabu emes. Bíz eshkímníń tańdauyn saralap nemese salystyru arqyly artyq-kemín kórsetkímíz kelmeıdí. Basty oı – meıírímdílíktíń barlyq tírshílík ıesíne ortaq ekenín eske salu. Qandaı tírshílík ıesí bolmasyn, ol adamnyń mahabbaty men qamqorlyǵyna mūqtaj. Osy maqalany oqı otyryp, síz de meıírím jaıly oılanyp qalsańyz – maqsatymyzdyń oryndalǵany.
Aqshamnews.kz tílshísí būl sūraqtyń jauabyn ómírlík mysaldarmen salystyryp kóruge tyrysty.
Meıírím men qamqorlyqty qajet etetín kez kelgen tírshílík ıesí – álsízdeu keledí: bírí – sábı bolsa, ekínshísí – januar.
Ekeuíníń de taǵdyry – eresek, estí adamnyń qolynda. Al kútímí – uaqytpen, shydammen, meıírímmen ólshenedí. Sońǵy jyldary úı januaryn, ásírese ıt pen mysyqty asyrap, olardy balasyndaı mápeleıtín jandar kóbeıíp keledí. Auyldy jerdí qaıdam, bíraq qalada úı januaryn asyraudyń, kútíp-baptaudyń orny bólek.
Balaǵa da, tólge de – uaqyt, kútím men kóńíl kerek
Jańa tuǵan náresteníń kútímín eshbír tírshílík ıesímen teńestíruge bolmas. Ony baǵu – tek fızıkalyq jūmys emes, júrekpen, bar oı-sanamen atqarylatyn borysh. Degenmen, bír jasqa deıíngí sábı men úı januarynyń tólín (kúshík nemese marǵau) tárbıeleu úderísí – kútím men emotsıyalyq baılanys jaǵynan ūqsas.
Búgínde ıt ne mysyq asyrauǵa jaı ǵana ermek dep qaramaıdy. Būl – úlken jauapkershílík, tártíp, qarjy jáne sezímge qūrylǵan qatynas. Ittí alǵash úıge alǵan sátten bastap, ıesí onyń rejımíne, tamaǵyna, qauípsízdígíne bas-kóz bola bastaıdy. Dál osy kúıdí jas ata-ana da bastan keshedí.
Tańǵy ūıqy ūmyt bolǵaly qashan
Ómírge sábı kelíp, balaly bolǵanda, ananyń túngí ūıqysy būzylyp, kún men túnníń auysyp ketetíní belgílí. Bala oyanady, jylaıdy, tamaq sūraıdy – ananyń nazary túgel soǵan auady.
It pen mysyq asyraushylar da dál osyndaı sátterdí bastan keshíremíz desek, artyq aıtqandyq emes deıdí. Máselen, frantsuz buldog tūqymdas “Leo” esímdí ıttí ıesí Tatyana kúníne úsh márte seruenge shyǵarady. Típtí úı januaryna kóbírek kóńíl bólu úshín ol ūıqydan erterek tūratyn bolypty.
«Leo úshín tańǵy 6-da tūramyn. Jūmysqa ketkenge deıín seruendetíp úlgeruím kerek. Basynda úıdegí zattardyń bárín tísteleı beretín. Qazír úıreníp qaldy», – deıdí ol kúlíp.
«Leo» kúshík kezínde 250 myń teńgege satyp alynǵan eken. Alǵan kezínde barlyq ekpesín teksertíp, bír jasqa kelgennen keıín qajettí ekpesín taǵy da saldyrǵan. Itíníń tamaǵyna kelgende sál qıyndyq bar deıdí Tatyana. "Ittíń íshíne sary maı jaqpaıdy" demekshí, osy tūqymdas ıtter allergıyaǵa beıím keletín kórínedí. Tamaǵyn baıqap bermese, íshí auyryp, ótíp qaluy múmkín. Sondyqtan ıesí ıtíníń mazasy qashpauy úshín onyń ne jegeníne qatty mán beredí eken.
«Jalpy, meníń bíluímshe, ıtterge shıkí tamaq bergen jón. Endí úırengeníne qaraıdy ǵoı. Sebebí olardyń ísh qūrylysy soǵan beıímdelgen. PH-ortasy qyshqylǵa beıímdelgen. Sondyqtan onyń as qorytu júıesí típtí mıkrobty da qorytady», - deıdí Tatyana.
Júní qysqa bolǵannan keıín Tatyananyń «Leo» esímdí ıtíne júnín qysqartudyń qajetí joq. Sondyqtan grumıng sıyaqty qyzmetke olar júgíne qoımaıdy. Bíraq kún saıyn ıtín úsh ret juyndyruǵa tyrysady. Barlyq qajettílígín jauapkershílíkpen oryndaıdy.
Aqsha shyǵyny – balada da, januarda da az emes
Jórgek, qospa (smes), bótelke, krem, maılyq, kıím, oıynshyq… Būl tízímdí bala kútímínde jalǵastyra beruge bolady. Jańa tuǵan balanyń alǵashqy bír jylyna ketetín qarajat – aı saıyn kem degende 50–70 myń teńge jūmsalady. Eger sapaly qospa, arnaıy kútím ónímderí qoldanylsa, būl soma ekí esege deıín artuy múmkín. Bír jasqa deıín balanyń densaulyǵynyń qalaı qalyptasyp kele jatqanyn baqylau úshín dáríger mamandardyń qabyldauyna aı saıyn baryp tūratyny taǵy bar. Jekemenshík emhanalarǵa barǵanda, būl da qarajatqa tíreletíní anyq.
Úı januaryna jūmsalatyn qarjyny adamǵa ketetín shyǵynmen salystyruǵa kelmes. Degenmen, ıesíníń qalauyna qaraı qomaqty qarajatty jaratatyn qyzmet túrlerí bar eken. It pen mysyqtyń qūrǵaq jemíne, arnaıy tamaǵyna – aıyna 20–30 myń teńge emín-erkín ketedí. Oǵan qosa grumıng (júnín qysqartu, juyndyryp, tyrnaq alu), dárumender, oıynshyqtar men tóseníshter qosylady.
Almaty qalasyndaǵy grumıng qyzmetíníń ortasha baǵasy:
• Itter úshín – 7 000 teńgeden joǵary;
• Mysyqtar úshín – 1 500 teńgeden bastalady.
Mysyqqa ketetín shyǵyn ıtten kem túspeıdí
Aıgúl esímdí qala tūrǵyny osydan bírneshe aı būryn habarlandyrudan kórgen marǵaudy asyrap alǵan. Aıtuynsha, būǵan deıín mysyq ataulyny asa ūnata qoımaǵan. Alaıda qolǵa úıretkenderíne kóp bolmasa da, qazír būl úı januaryna qatty bauyr basyp qalǵan kórínedí. Súıkímdí marǵau alǵash kórgennen-aq ózíne tartyp, janūyanyń tolyqqandy múshesíne aınalypty.
«Mysyǵymyzdyń júní bastapqyda mamyq sıyaqty úlpíldep tūrdy. Sondyqtan ony Pushok dep atadyq. Qazír oǵan qatty bauyr basyp qaldym. Jūmystan kelgende ol maǵan erkelep, saǵynyshyn bíldíredí. Kún ótken saıyn jańa dosyma qalaı qamqor bolu kerek ekenín úıreníp kelemín», - deıdí Aıgúl.
Iesíníń sózínshe, «Pushoktyń» qazír barlyq jaǵdaıy jasalǵan. Onyń mysyqtarǵa arnalǵan susabyny, jeke súlgísí, arnaıy fení, úıshígí men ydystaryna deıín bar. Kóńíl-kúıíne qaraı jeıtín jemíne deıín ár túrlí.
Úı januarlaryna kórsetíletín grumıng qyzmetí jaıly sūraqqa Aıgúl: «Būl qyzmetke de júgíníp kórdík. Baǵasy 15 myń teńge boldy. Ekí saǵat íshínde juyndyryp, júnín qyrqyp, tyrnaǵyn alyp, retke keltíríp beredí eken. Kóńílímízden shyqty», - dep jauap berdí.
Emotsıyalyq baılanys – basty ortaq qasıet
Balaǵa da, januarǵa da eń bastysy – meıírím kerek. Olar sózben emes, júrekpen sezedí. Sábıler anasyn ıísínen, dauysynan tanıdy. Al ıtter ıesíníń ıísín 40 ese artyq sezedí degen ǵylymı dálel bar.
Januar da, sábı de sízdíń nazaryńyzdy, emotsıyańyzdy, kóńíl kúıíńízdí qalt jíbermeıdí. Sízden jaılylyq tapsa – soǵan úırenedí, senedí, súıenedí.
Úı januaryn qarap beretín qyzmetter de bar
Januar asyraushynyń aldynan erte me, kesh pe, bír másele tuyndaıdy: «Men joqta ıtímdí/mysyǵymdy qaıda qaldyram?» degen. Būl – ıt pen mysyqqa tek qysqa uaqyttyq ǵana emes, psıhologıyalyq jaılylyq ta qajet ekenín bíldíredí.
Qalaly jerde januarlardy qaldyryp ketuge bolatyn qonaqúıler bar ekenín bíreu bílse, bíreu bílmes. Máselen, Almatyda mysyqtar men ıtterdí bír táulíkke qaldyryp, qaratu qūny- 6 000 teńgeden bastalady. Januardyń salmaǵyna qaraı 6 000–9 000 teńgege deıín jetuí múmkín. Al «All Inclusive» bolsa - 15 000 tg. Típtí súıíktí úı januaryńyzǵa qalaı qaraıtynyna senímsízdík bíldírseńíz, beınebaqylau ornatylǵan qonaqúıler de bar.
Mūndaı uaqytsha kútímdí úı jaǵdaıynda ūsynatyndar da bar.
• OLX.kz jáne Market.kz saıttarynda jeke adamdar ūsynatyn qyzmetter bar.
• Mysyqtarǵa – 1000–1200 tg/táulík.
• Itterge – 2000 tg-den bastap.
• VIP nūsqalarynda: kúndelíktí seruen, foto/vıdeo esep, arnaıy bólme sekíldí qyzmetter ūsynylady.
Qonaqjaı halqymyz toıǵa bararda, balany, típtí úıdí qarap qalatyn adam ízdeıdí. Sondaı kezde tuys-tuǵannan kómek sūrap, ata-ájesíne qaldyrady, típtí bolmaǵan jaǵdaıda, bala kútushí jaldap, qyzmetíne qaraı aqshasyn tóleıdí. Adamnyń balasy men januardyń tólín qaratuda osyndaı ūqsastyq bardaı kóríndí.
It asyrau da, bala baǵu da – júrektíń qalauy. Bírí – ómírge kelgen perzentíńíz, ekínshísí – senímdí serígíńíz. Ūqsastyqtaryn tízíp, shyǵyndaryn eseptep, aıyrmashylyqtaryn salystyruǵa bolady. Bíraq būl maqala eshqaısysyna artyqshylyq berudí maqsat etpeıdí.
Maqsat – eske salu: kím bolsa da – sábı me, januar ma – tírshílík ıesí meıírímge záru. Olardyń árqaısysy qamqorlyqty, nazardy, mahabbatty shynaıy sezínedí.