Qazaqstan men Iran prezıdentteri shaǵyn quramda kelissóz júrgizdi, dep habarlaıdy Almaty-akshamy.kz Inform.kz- silteme jasap.
Qasym-Jomart Toqaev resmı saparmen kelýge shaqyrǵany úshin Ibrahım Raısıge rızashylyǵyn bildirdi.
«Eń aldymen, bizdi ystyq yqylaspen qarsy alǵandaryńyz úshin alǵys aıtamyn. Sizdiń shaqyrýyńyzdy zor rızashylyqpen qabyldadym. Prezıdent retinde Iran eline alǵash ret kelip otyrmyn. Men úshin bul sapardyń mańyzy erekshe. Búgingi kelissózderimiz eki eldiń yntymaqtastyǵyn damytýǵa tyń serpin beredi dep senemin. Qazaqta «Kórshi aqysy – táńir haqysy» degen sóz bar. Biz – kórshimen árqashan tatý bolǵan elmiz. Iran – Kaspıı jaǵasyndaǵy jaqyn kórshimiz, senimdi seriktesimiz», – dedi Qazaqstan Prezıdenti.
Memleket basshysy elderimiz arasynda dıplomatıalyq qatynas ornaǵanyna bıyl 30 jyl tolǵanyn atap ótti. Prezıdenttiń aıtýynsha, osy kezeń ishinde yntymaǵymyz artyp, dostyǵymyz nyǵaıa tústi.
«Jan-jaqty baılanysymyz qarqyndy damyp kele jatyr. Buǵan ózara senimge negizdelgen saıası dıalogtyń arqasynda qol jetkizip otyrmyz. Bizdiń úkimetaralyq, parlamentaralyq jáne iskerlik keńesterimiz bar. Saýda-ekonomıkalyq yntymaqtastyǵymyz kedergilerge qaramastan, jyldan-jylǵa artyp keledi. Bıylǵy birinshi toqsanda saýda-sattyq 50 paıyzǵa artty. Endigi maqsat – osy qarqyndy toqtatpaı, barynsha kóbeıtý. Oǵan bizdiń áleýetimiz jetedi. Men sizdiń ózara seriktestikti damytýǵa qosqan úlesińizdi joǵary baǵalaımyn. Qarym-qatynasymyzdy damytýǵa bar kúsh-jigerimdi jumsaýǵa ázirmin», – dedi Memleket basshysy.
Qasym-Jomart Toqaev osy saparynyń aıasynda mańyzdy sheshimin jarıalaýǵa uıǵarym jasaǵanyn aıtty.
«Biz Iran azamattarynyń Qazaqstanda 14 kún vızasyz júrip-turýyna ruqsat beremiz. Bul túrli saladaǵy yntymaqtastyqty nyǵaıtýǵa septigin tıgizedi. Sondaı-aq, isker top ókilderiniń baılanysyn jandandyrady. Barys-keliske tyń serpin berip, týrıserdiń kóptep kelýine yqpal etedi. Iran kásipkerleri osy jeńildikti keńinen qoldanady dep senemin», – dedi Qazaqstan Prezıdenti.
Iran Islam Respýblıkasynyń Prezıdenti Ibrahım Raısı Qasym-Jomart Toqaevqa iltıpat kórsetip, shaqyrýyn qabyl alǵany úshin alǵys aıtty.
«Biz alǵash ret Dýshanbe samıtinde kezdesken edik. Sizben ekinshi ret Tegeranda júzdesip otyrǵanyma qýanyshtymyn. Sizdiń Prezıdent retinde kelgen bul saparyńyz ekijaqty qarym-qatynastarymyzdyń damýyna tyń serpin beretin uly betburys bolaryna senimdimin», – dedi Iran Prezıdenti.
Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/iran-azamattarynyn-kazakstanda-14-kun-vizasyz-zhurip-turuyna-ruksat-beriledi-prezident_a3946064