Baǵdarlama 10 qyrkúıekte efırge shyǵady
Almatynyń bilimdi oqýshylary baq synaıtyn «IQ Almaty» ıntelektýaldy shoýy kórermenge qaıta jol tartady, dep habarlaıdy Almaty-akshamy.kz Almaty.tv-ge silteme jasap.
Baǵdarlamanyń maqsaty – mektep túlekterine jańa ómir belesine qadam jasaýǵa múmkindik berý. Jobaǵa Almaty qalasyndaǵy 11-synyp mektep oqýshylary iriktelinip alynady. Ár kezeńde úzikterdi anyqtap otyratyn joba 5 kezeńnen turady.
«Bul joba zamanǵa saı qajetti ári paıdaly joba. Ádettegi oıyn-saýyq jobalaryna uqsamaıdy. Urpaqty damytýǵa qosatyn úlesi kóp. Jastar ol – ulttyń avangardy desek bolady. 2020 jyldan beri bilimge kóp kóńil bólinip jatyr. Álem boıynsha bilimdi adamdardyń tasy órge domalap jatyr. Sol sıaqty qazaq elinde de bilim salasyn damytý, jańalyq ashýǵa talpynyp jatqanymyz sózsiz. Osy turǵydan alǵanda «IQ Almaty» baǵdarlamasy jastarǵa úlken ómirge qadam jasaýǵa múmkindik beredi», – dedi shef-redaktor Baıan Baqkeldi.
Al 16 jasynda osyndaı baǵdarlamaǵa qatysqan joba júrgizýshisiniń aıtýynsha, ıntelektýaldy saıys urpaq tárbıesine, bilim sapasynyń artýyna zor yqpal etedi.
«2009 jyly qatysqam. 16 jasta edim. Joba kerek. Elimizdi damytýǵa, jastardy durys jolǵa salýǵa, baǵyt berýde óz reıtıńisin kórsetedi. Júzden júırik, myńnan tulpar – bilimdi jastar qatysady. Osyndaı zıatkerlik baǵdarlamanyń kóbeıgeni qýantady. Al ony júrgizý men úshin jaýapkershilik ári mártebe», – dedi baǵdarlama júrgizýshisi Dáýlet Muqaev.
Bes kezeńnen iriktelip alynǵan 2 oqýshy JOO-da oqýǵa múmkindik alady. Jobanyń tıimdiligi sol – JOO bilimdi stýdentti qabyldasa, túlekter tegin oqý arqyly jarqyn bolashaǵyna joldama alady. Sondaı-aq baǵdarlama barysynda qala mektepteriniń deńgeıin de anyqtaýǵa bolady. Al mektep baǵdarlamasyndaǵy suraqtardy qoıý arqyly kórermendi de qyzyqtyrady. Bastaýysh ne orta býyn oqýshylaryn sabaqty jaqsy oqýǵa yntalandyrady.